Indian player-te tan Covid-19 vaccine

Board of Control for Cricket in India (BCCI) chuan Indian Premier League khel mek Indian player-te tan May 1, Inrinni aṭangin a thlawnin Covid-19 vaccine a pe dawn a, lak ngei ngei tur erawh a ni dawn lo. India sorkar pawhin May 1 aṭangin kum 18 leh a chunglam tana Covid-19 vaccine an pek ṭan tur thu an puang tawh bawk.

BCCI hruaitu zinga mi a hming tarlan loh chuan, "Inrinni aṭangin Indian player-ten vaccine an la ṭan thei ang. An lak duh leh duh loh chu player-te thuneihna a ni a, Indian player tan chauh a ni," tiin a sawi.

Australian player pathum Andrew Tye (Rajasthan Royals), Adam Zampa leh Kane Richardson (Royal Challengers Bangalore ve ve) te chu an ramah an haw tawh a, player ṭha dang Steve Smith leh David Warner te pawh Covid-19 vang hian haw an tum nia sawi a awm bawk.

IPL hmalam hun a chiang lo a, chutihrualin BCCI lam chuan ruahman lawkna anga kalpui zel an tum. Kumin final hi May 30-a khelh tur a ni.