Pahnihnaah Nadal a kir

Mipa tennis thuneitu sang Association of Tennis Professionals (ATP) chuan ranking thar a tichhuak, pathumna a nih zuai hnuah Rafael Nadal chu pahnihnaah a inhlangkai leh ta.

Spanish player hian tun hnai khan Barcelona Open nomawi chu a vawi 12 nan a chawi a, ranking lama amah tlan peltu Daniil Medvedev chu point 110-in a lehpel ve leh ta thung a ni.

Clay court bikah Nadal hian title 61 zet a la tawh, amah hnaih bertu Guillermo Vilas (49 titles) nen an inthlau hle. May 30 aṭangin French Open an khel ṭan dawn a, champion lai Nadal bawk hi rinkai a ni leh ang.