Bayern manager thar Nagelsmann

Bayern Munich chuan nimin khan RB Leipzig manager Julian Nagelsmann chu season thara an manager a nih tur thu an nemnghet. Kum 33 mi Nagelsmann hian kum nga daih contract a ziak a, Hansi Flick thlakin July 1, 2021 aṭangin Bavarians manager a ni ṭan ang.

Tottenham Hotspur-in Jose Mourinho thlak nan Nagelsmann hi an beisei a, English club hian German manager hmabak nei êng tak hi an chang dawn ta lo. Kum 2017-a Bayern-in Carlo Ancelotti an ban khan Nagelsmann-a hming hi a ri tawh a, khatih hunlaia sporting director Matthias Sammer chuan, "Hunin a hril ang chu," tiin a chhang a, tunah chuan a takin a thleng dawn ta.

Nagelsmann-a hun
Nagelsmann hi khawvel manager langsar zingah a tel tawh nachungin kum 33 mi chauh a la ni a, kum 23 a nih aṭanga Hoffenheim Youth Academy a enkawl tawh avangin a lar hma hi a mak lo. Kum 28 a nihin Hoffenheim senior team a enkawl tawh a, Bundesliga-a manager ni thei naupang ber a ni a. Kum 2017 khan German Football Manager of the Year atan thlan a ni.

RB Leipzig-in an hnena contract nei Nagelsmann hi awlsam takin an chhuah lo. Germany chanchinbu lian Bild-in a tarlan dan chuan Bayern hian Nagelsmann manah hian euro maktaduai 15 an pe dawn a, a hlawhtlin chhoh dan a zirin a man hi euro maktaduai 23-ah a pung chho thei dawn.

Kum 33 mi Nagelsmann hian RB Leipzig-ah hian season khatah euro maktaduai thum a hlawh mek a, Bayern-ah hi chuan Hansi Flick-a hlawh zat, season khata euro maktaduai riat vel hlawh tura sawi a ni.

Bayern president Herbert Hainer chuan, "Julian Nagelsmann hi football zirtirtu chhuak thar ṭha ber zinga mi a ni a, kum nga contract kan ziahpui hian FC Bayern-in kan rinzia a ti lang. Bayern nen hian hlawhtlinna tam tak kan chan ka ring tlat a ni," tiin a sawi.

Germany coach thar Flick?
Bayern manager Hansi Flick-a'n club hotute hnenah season tawp ruala a contract ti tawp turin a dil a, club chhung buaina awm bawk mah se Euro Championship zawhah Joachim Low-a'n a hna a kalsan dawn vangah a ngaih theih.

Flick hian hun rei tak Germany assistant coach hna a thawk a, World Cup 2014-a Germany an champion ṭum pawh khan Low-a thachhang dawltu a ni. Kum 2019 khan Niko Kovac pui turin a khelh tawhna ṭhin Bayern a zawm a, Croatian manager November 2019-a ban a nih khan Bavarians a enkawl ṭan.

Kum 56 mi Flick hian season khatanah Bundesliga, Champions League leh German Cup-ah te a champion pui vek a; Club World Cup bakah German Super Cup leh UEFA Super Cup nen nomawi paruk a chawipui tawh. Tun season-ah Bundesliga an champion leh dawn a, season khat leh a chanve chhung lekin nomawi pasarih a champion pui dawn tihna a ni.

Hainer chuan, "Hansi Flick hming hi FC Bayern history ziahna buah a chuang kum khua tawh ang," tiin manager kal chhuak tur hi a fak.

Manager lei chungchang
Manager in lei chhuah hi football khawvelah thil thar a ni lo, kum 2011 khan euro maktaduai 15 thoin Chelsea-in FC Porto aṭangin Andres Villas-Boas an lei chhuak tawh a, bonus nen erawh Nagelsmann-a man a to zawk ang.

Leicester City pawhin Celtic aṭanga Brendan Rodgers la turin Scottish club hnenah euro maktaduai 10.5 an pe a, Sporting Lisbon pawhin Sporting Braga hnenah Ruben Amorim manah euro maktaduai 10 an pe bawk.

Kuminah ringawt pawh Bundesliga-ah ṭum hnih a thleng. Borussia Monchengladbach chuan Eintracht Frankfurt manager Adi Hutter an la dawn a, euro maktaduai 7.5 an seng. Borussia Dortmund-in Glabach manager Marco Rose an lakluh theih nan euro maktaduai 5 an hmang bawk.