UEFA-in Ibra-a chhui dawn

European football-a thuneitu sang ber UEFA chuan AC Milan striker Zlatan Ibrahimovic chu sum inthapna company lama a inhnamhnawih avangin an chhui chiang dawn a, Swedish striker hma hun hi a êng lo viau mai thei.

Kum 39 mi Ibra hian sum inthapna lam buaipui ṭhin company Bethard-ah a company Unknown AB kaltlangin 10% share a nei nia sawi a ni a, UEFA danah chuan player-ten sum inchawina lam hawi reng rengah hlawkna an tel a thiang lo.

Tun hnaia Milan-a kum khat dang cham tura contract thar ziaktu Ibra hian mimal taka inhnamhnawihin sum thapna lamah tel lo mah se a company kaltlanga hlawkna ava neih pawh hi player tan a thiang lo a, UEFA hian thiam loh an chantir a nih ngat chuan a career tan thlengin a hlauhthawnawm mai thei.

UEFA chuan, "Zlatan Ibrahimovic-a'n sum inthapna company-ah sum hlawkna a tel nia sawi hi UEFA inkaihhruaina dan bawhchhiatna a ni a, a tak ngei a nih leh nih loh fiah turin UEFA ethics & disciplinary inspector chu vawiin khan ruat a ni," tiin thuchhuah an siam.

Manchester United tan pawha lo khel tawh Ibra hian tun season inelna hrang hrangah Milan tan match 25 khelin goal 17-a khung a, assist vawi thum a nei - kumin kumtir khan kum nga zet ram tana a khelh tawh loh hnuin international football khel turin a lo kir leh bawk.

Hetihlai hian Ibra hi Italian Football Federation chuan Inter Milan striker Romelu Lukaku nena an thubuai avangin €4,000 (Rs. 3,60,185) chawi turin an lo hrem ve bawk a, Lukaku hi €3,000 (Rs. 2,70,139) chawitir a ni thung.

January khan Coppa Italia match-ah Inter leh AC Milan an intawng a, Milan derby-ah hian striker palian pahnih hi an intibuai - Ibra hi hnawhchhuah a ni a, vun rawng inhmuhsitna ṭawngkam a hmang anga sawi a nih chungchang erawh a pha thung a ni.

Striker pahnih hi an ṭawngkam hman mawi loh avangin hrem an ni a, an club khelhnate chu hrem ve an bawk - AC Milan chu €2,000 (Rs. 1,80,092) chawitir niin Inter Milan chu €1,250 (Rs. 1,12,558) chawitir an ni thung.