Palace aia thiam zawk Foxes
Leicester City tan Champions League khelh a 'chiang' teuh tawh hle. Brendan Rodgers-a naute hian an mikhual Crystal Palace 2-1 a hnehin Premier League table-ah pathumna dinhmun an sawhnghet.
Season hmasa khan Foxes hi UCL khel thei dinhmunah an ding reng a, mahse season tawpah an zuih avangin an khel phak lo. Kuminah erawh an ṭang tlang thei dawn niin a lang, point 62 hmuin pangana West Ham aiin point sarihin an sang mek.
A hmuhnawm
Thawhṭanni zan King Power Stadium-a inkhel a hmuhnawm, minute 12-na lekah Wilfried Zaha goal kan hmu. English midfielder Eberechi Eze-a'n Leicester City defender pahnih inkarah mawi takin through ball a pe a, forward Zaha tan hna harsa a awm tawh lo.
Palace tlarhnung an ding khawng ṭha a, chawlhlawk hmain goal dang a lut zui lo. Second half tirah erawh Kelechi Iheanacho sut kuaksa chu Timothy Castagne-a'n a khung, goal khungtu Castagne pawhin a pet ṭha ve tawk bawk.
Goal khat ve ve an neih laiin Palace lamin hun ṭha bik an hlah. Christian Benteke-a'n keeper chauh hmachhawn tawhah nuamsa takin khung turah inngai mah se defender Jonny Evans chuan lo pet sawnsak hmanin an goal a venghim.
English defender Evans-'n hun tawp dawnah hla tak aṭangin Iheanacho a hmu fuh, Nigerian forward hi defender pahnih inkarah rang zeta insiamremin goal lamah a pet thut a, ball kal a nat avangin keeper Vicente Guaita tan dan theih a ni lo.
Foxes an thiam
Season hmasa league match 33 an khelh tlin khan Leicester City hi Premier League table-ah pathumna an ni, kumin nen an dinhmun a inang. Nikum khan an match hnuhnung panga zinga pathumah an tlawm a, a sang pali zingah an tel phak ta lo a ni.
Palace nen an inhmachhawn hmain Rodgers chuan hma an sawn tawh thu a sawi a, inkhel tir lamah che fuh tawk lo mah se second half an khelh dan thlir chuan UCL khelh an tum takzet tih a lang chiang hle.
League match a khelh hnuhnung 14 aṭanga goal 14 khungtu Iheanacho a hmuhnawm a, hmun chep tak karah pawh remchang a insiam chawp thei. Jamie Vardy erawh a vanneih zan a ni lo, goal khung theihna remchang vawi thum a hlah.
Chak lo Palace hi table-ah 13-na an ni a, tla thei china awm Fulham aiin point 11 zetin an sang - an tan European football beiseina chu a thi tawp tluk a ni bawk; table laihawla awm chungin season an hmang zo dawn tih a lang.
Eng nge an sawi?
Leicester manager Rodgers chuan, "Tun hnai ni kua chhungin match thum kan khel, inhnaih tak taka match neih hautakzia ka hrechiang, chuvangin hnehna kan chang thei hi a lawmawm hle. A bik takin Roy-a team hmachhawn hi a awlsam ngai lo.
"Player zawng zawng an khel ṭha, a bik takin tun hnaiah Iheanacho a khelh ṭhat zual avangin ka lawm. Vardy pawhin ngai a awh chho leh thuai dawn, ani a awm hi chuan midang pawhin inrintawkna an neih phah ṭhin," tiin an tana English striker pawimawhna a sawi.
Crystal Palace manager Roy Hodgson chuan, "A nihna takah chuan point khat tal hmuh kan phu. Goal kan nei hmasa a, 1-1 a nih hnuah pawh khung belh ngei theihna tur nia lang kan hlah tlat si, vanduai chang hi chu a awm ve chiang.
"Second half tir lamah kan inthlahdah zeuh avangin min hrem, hun tawp dawna Kelechi Iheanacho chet dan kha chu ven a harsa. Ball hlauhawm ni miah lo kha goal pawimawh atan a siam chhuak thei," tiin a sawi.
