Team vanduai Goa tan beisei tur a awm tawh lo

AFC Champions League-a an season hmasa berah FC Goa-in group stage an paltlang dawn lo tih a chiang tawh a, Thawhṭanni zan khan Al Rayyan nen 1-1 in an ihnehtawk.

Goa hian minute thumna lekah Jorge Ortiz hmangin goal hmahruai an khung a, an chakpui mai dawn nia a lan hnuah Al Rayyan tan Ali Ferydoon chuan minute 89-naah si phurh a sut - Goan club an vanduai. FC Goa-te inkhelh hma hian group E inkhel dangah Al-Wahda chuan hmahruaitu Perspolis chu 1-0 in an barakhaih a, hei vang hian Goan club tan a tlang theih loh tih a chiang tawh.

Mahse, Juan Ferrando nauten mualpho taka Asian football-a club inelna sang ber mangṭha an duh lo a, an theihtawp an chhuah - point thum hmuh nan erawh a tling zo ta lo.

Inkhel hmasa
FC Goa-in an match hmasa pahnihah goal khung loin Al-Rayyan leh Al-Wahda an inhnehtawkpui a, match thumnaah 2-1 in Perspolis an ngam lo zui - a vawi khat nana Champions League khel FC Goa result hi a zahpuiawm loh.

A nihna takah chuan group E-a team pali enin Goa an hniam ber a, an elpui club-te nen player khaikhin chi a ni lo. Match hmasa pathum aṭanga point hnih hlawhchhuah hi Goan club tan result ṭha a ni.

Perspolis laka 2-1 a an tlawm ṭum pawhin Goa-in goal an khung hma zawk a, an vanduai tiin a sawi theih - an intawn vawi hnihnaah erawh Ferrando-a'n season hmasa Champions League finalist laka chak tum chu thil atthlakah a ngai.

Spanish coach hian hei vang hian an intawn vawi hnihnaah player ṭha a hahchawlhtir nual a, Al-Rayyan leh Al-Wahda laka chak a tum vang a ni - 4-0 in an tlawm zui a, mualphonaah erawh chhiar a ni lo.

Tichuan...
Thawhṭanni zanah group E inkhel pahnih a awm zui a, a hmasa zawkah Al-Wahda leh Perspolis an intawng - rin loh takin Al-Wahda an chak a, Slovenia international Tim Matavz chuan inkhela goal awmchhun hi minute nganaah a khung.

Minute 83-naah Al-Wahda forward Abdulla Anwar hnawhchhuah a ni a, mahse, a tlai tawh avangin Perspolis tan thawh ngaihna a awm tawh lo. He inkhel result hi Goa tan a pawi zui.

Al-Wahda an chak chiah hian Goan club-in an hmabak match hnihah hnehna chang pawh ni se an tlang thei tawh lo tih a chiang zui a, Goa tana khelh chhan tur chu hmingṭhatna chauh a ni tawh.

Al-Rayyan lakah Indian club an hnual phah lo - minute thumna lekah Brandon Fernandes-a ball pek duhthusam chu Ortiz-a'n Goa tan a khung a, Champions League-ah Goan club-in goal hnih an khung vena chiah a ni.

A pawi zo ta
Goa-in goal an khung a, team ṭha zawk Al-Rayyan an hlauhawmzui - Ivory Coast tana vawi sarih inlan tawh, forward Al Yohan Boli chu Goa tlarhnung tan buaipui tham a tling a, hetihlai hian Ortiz-a'n Qatari club tan harsatna a siam ve reng tho.

First half-ah Manipur keeper Dheeraj Singh hmuh tur a awm leh ṭhin a, a match hmasa pahniha khel ṭha tak keeper hian level sang taka inkhel turin a inpeih tawk tih a pholang nawn.

Second half-ah Al-Rayyan lamin an beisei angin goal an nei thei lo a, Goan club hi an chak mai dawn niin a lang - mahse, beisei loh thil a thleng a, hun tawp nan minute khat chauh a awm tawh tihah Al-Rayyan in si phurh an sut!

Abdulaziz Hatem-a'n mual sirah ball a lalut a, a cross - Dheeraj Singh-a'n a lo dang per a, a per lehlam hi Ali Ferydoon ke bulah a tla a, a pet goal. Hun a tawp zui a, 1-1 in team pahnih an inhnehtawk.

Hmabak
FC Goa-in an group stage match hnuhnung ber chu Ningani zan dar 10:30-ah an khel dawn a, Al-Wahda nen an inkhel ang - result hian Goa dinhmun a ti danglam thei tawh lo a, Al-Wahda tan erawh inkhel pawimawh a ni thung.

Team pahnih intawn hma hian Perspolis leh Al-Rayyan an inkhel dawn a, French legend Laurent Blanc-a enkawl Al-Rayyan hian hnehna an chang a nih chuan Al-Wahda tan Goa hnehin group hmahruaitu a la nih theih.

AFC Champions League-ah hian team 40 an inel a, group 10 (A-J) ah ṭhen an ni. Group A-E hi 'West Region' tih niin 'East Region' ah group F-J an awm thung. Group tina pakhatna ṭheuhin last 16 an lut ang a, region pahnih aṭanga pahnihna ti ṭha pathum ve vein knockout round hi an lut dawn bawk.

Chumi awmzia chu Al-Wahda hian Perspolis ngam lo pawh ni se, pahnihna an ni chiang tawh a, West region aṭanga pahnihna ti ṭha pathum zinga tel an la beisei thei cheu - tun dinhmunah chuan West region-a pahnihna zingah anni aia point hmu sang an awm lo.

Minute tawpa goal kan chhuah chuan a harsa tawh ṭhin a, mahse, kan hmachhawn team kha an ṭha em a ni - football hmuhnawm tak khel ṭhin team hmachhawn hi chu a nuam hle. Game pawimawh tak kan khel a, India-in hun thim tak a tawn mek lai a nih avangin mipui tana chak kha kan chak takzet. Ka player-ten hna an thawk ṭha a, hmasawn erawh kan ngai reng a ni. Al-Wahda kan la hmachhawn leh dawn a, player inhliam nen inbuatsaih erawh a harsa ṭhin hle a ni. - Juan Ferrando, FC Goa coach