Europa League beiseitu Sociedad

La Liga-ah Atletico Madrid, Real Madrid, Barcelona leh Sevilla-ten Champions League hmun ruak an hauh nghet chiang tawh a, a hnuai lamah Real Sociedad pawhin Europa League khelh ngei tumin an dinhmun an sawhnghet zel.

Sociedad hian Thawhṭanni zan khan La Liga table mawngphah luahtu Eibar chu 1-0 in an hneh a, Alexander Isak chuan inkhela goal awmchhun hi a khung - Eibar-in a chhanletna tur an nei lo a, Real Sociedad an chak.

La Liga-ah pangana leh parukna hi Europa League group stage khel turin an tling ṭhin a, Sociedad hian parukna dinhmun an luah mek - match nga chiah khelh tur awm tawhah pasarihna Villarreal aia an sanna chu point li a ni.