Kolkata-in Punjab an hneh awlsam

Thawhṭanni zan khan Kolkata Knight Riders-in Punjab Kings wicket ngain an hneh. Narendra Modi Stadium-a inkhelah Punjab Kings-in run 123/9 chauh an siam a, Kolkata-in over 16.4 lekah run 126/5 siamin hnehna an chang.

Indian Premier League khelh mekah Chennai Super Kings, Delhi Capitals leh Royal Challengers Bangalore te vawi nga khelh aṭangin vawi li ṭheuh an chak a, table chung lamah an awm. Zanin dar 7:30 hian MS Dhoni captain-na hnuaia khel Chennai-in Sunrisers Hyderabad an hmachhawn ang.

Punjab leh Kolkata inkhelh dawnah Kolkata chu ṭhumvawrah an vannei a, vawm hmasak an thlang. Punjab tan Mayank Agarwal (31) leh Chris Jordan-te (30) che chhe lo mah se thlawptu ṭha an neih loh avangin over 20-ah run 123/9 chauh an siam.

Kolkata tan target awlsam takah a ngaih theh a, amaherawhchu opener pahnih Shubman Gill (9) leh Nitish Raina (0) te an chet chhiat avangin inkhel a hmuhnawm chho a. Knight Riders tan Rahul Tripathi (41) leh England batsman Eoin Morgan (47) te rawn che ṭhain over 16.4-ah run 126/5 siamin hnehna an chang.