AC Milan ngamtu Lazio

Serie A champion nih tum AC Milan tan season thara Champions League khelh ringawt pawh a harsa dawn ta. Milan hi an mikhualna ramah Lazio chuan 3-0 in an lo sawp a, an tan league title beisei ngam a ni tawh lo.

Stefano Pioli nauten hnehna chang se chuan pahnihna dinhmun an luah thei tih an hria. Beiseina sang tak nen Laizo an tlawh, striker Zlatan Ibrahimovic chu hrem a nih bakah hliam a neih bawk avangin a chawlh a ngai.

Ismael Bennacer leh Theo Hernandez an inlan thei tawh a, striker Mario Mandzukic chuan a vawi khat nan Milan jersey nen inkhel bul a ṭan bawk. Ṭan aṭanga second 20 lekah Hakan Calhanoglu-a'n keeper Pepe Reina tan hna hautak a siamsak nghal.

Milan beiseina a san viau laiin an tlarhnung a phui lo. Joaquin Correa-a'n goal hnih a khung bakah Ciro Immobile chuan hun tawp dawnah goal khat a nei bawk. Lazio hian goal thum aia tam khung theihna remchang nei mah se offside vanga an pawm loh bakah bar an tih per.

Chak lo Milan hi point 66 neiin table-ah pangana an ni a, an chunga awn Juventus leh Napoli te nen an point a inzat - pahnihna Atalanta an phak lohna chu point hnih a ni. Pangana Lazio pawhin point 61 an neih bakah match khatin an khel tlem a, UCL beiseina an la nei ve bawk.