Real Madrid leh Chelsea an inhnehtawk

Estadio Alfredo Di Stefano-ah Chelsea leh Real Madrid ten Champions League semifinal first leg an khel a, inkhel hmuhnawm tak an pho chhuak. Thomas Tuchel-a hoten chak phu khawpin khel ṭha mah se Real Madrid-in player class bik Karim Benzema an nei a, 1-1 in an inhnehtawk.

Thawhlehni zan inkhelah hian London club-in bul an ṭan ṭha a, Christian Pulisic hmangin minute 14-na lekah goal an khung. Mualneitu lam tan minute 29-naah Karim Benzema a rawn lang a, goal dang hmuh tur a awm tawh lo. May 5, Nilaini zan hian Stamford Bridge-ah second leg khelh a ni ang.

An inrem e
Chelsea manager Thomas Tuchel-a'n West Ham 1-0 a hnehtute chungah rinnna an nghat a, kartawp inkhela bul ṭantute bawkin bul an ṭan. Right back-a khel turin Reece James aiah captain Cesar Azpilicueta a thlang a, James hi lut se chuan Azpilicueta hi centre back pathum zingah a tel thei ang.

Amaherawhchu Tuchel hian Andreas Christensen chu Antonio Rüdiger leh Thiago Silva te nena inkawp turin a ring tawk. Midfield-ah Jorginho leh N'Golo Kante te inkawpin tlarhmaah Timo Werner thlawp turin Christian Pulisic leh Mason Mount te an awm. Tun season UCL-a Blues tana goal khung tam ber Olivier Giroud chu bench-ah dah a ni thung.

Real Madrid squad-ah hliam vangin Sergio Ramos a tel lo a, Los Blancos hi an captain tel loa UCL match 13 an khelhah vawi riat an chak lo. Chutihrualin Zinedine Zidane-a'n tlarhmaah Karim Benzema leh rawlthar duhawm Vinicius Junior te a dah thei a, midfield-ah tawnhriat nei ṭha pathum Toni Kroos, Casemiro leh Luka Modric te an awm avangin ngaihtuahawm an ni lo.

Chelsea chhuanvawr ni ṭhin Eden Hazard chu bench-ah a awm a, tlarhnungah Blues keeper hlui Thibaut Courtois a awm bakah defence hui khawm turin Raphael Varane a awm bawk. Hriat tel tur a ṭha chu Los Blancos hian final thleng turin English club Liverpool an hneh.

Tuchel-a kut hnu
Thomas Tuchel-a'n player a rem danah a tum a tichiang tih a lang a, counter attack hmanga rang taka an nawr let theih nan player tlan chak Pulisic leh Werner tlarhmaah a dah. Real Madrid-in an mualah inkhel thunun an tum ve thung a, Zidane aiin Tuchel a hlawhtling zawk.

Chelsea-in na takin an vaw let thei zel a, Timo Werner finishing ṭhat tawk loh avang chauhin game plan ṭha tak a hlawhtling tawk lo. Minute 10-na lekah Mount-a cross chu Pulisic-a'n tauh letin goal ruaka ngaih theihah Werner-a'n keeper Courtois a pet per, German forward hi goal hmaah a 'zuzi' leh ṭhin.

Blues-in an nawr na bawk a, goal erawh hmuh turin a awm ta vat. Rudiger ball vawrhchhuah chu Real Madrid offside trap bumtu Pulisic-a'n la thlain keeper Courtois a bum hnuah minute 14-naah goal ṭha bik a khung.

A hming chu Benzema
Cristiano Ronaldo awm loh hnua Real Madrid innghahna chu Gareth Bale emaw Hazard emaw ni loin Benzema a ni. French striker hian minute 23-naah amaha chance insiam chawpin goal ban a pet per a, minute 29-naah goal ropui bik a khung.

Corner aṭanga inṭanin Marcelo ball vawrhluh Casemiro-a'n a hlauhawm laiah a tauh let a, Benzema tan ball ṭha tih tur ni lo mah se Real Madrid striker hian pet goal theih turin a lu hmangin an insiamchawp a, kawh zetin a volley goal.

Real Madrid-in inkhel thunun ṭhin mah se Chelsea-in goal hlauhawm an ngah a, Werner-a zuan sang tawk loh vangte leh finishing ṭhat tawk loh vangin first half-ah 1-1 a ni. Blues-in away goal hlu tak nei mah se an khelh ṭhat dan thlirin an hun ṭha bawhpelh an ui ang.

Second half a danglam
Mualneitu Real-in inkhel thunun kher an tum tawh lo a, goal venhim an pawi ti lo. Inkhel kal hmang a danglam a, Tuchel pawhin an khingpuiten an khelh dan hmang an thlak tih hriain minute 66-naah Hakim Ziyech, Kai Havertz leh Reece James te luhtirin an nawr dan hmang a thlak.

Chelsea tan Kante a hmuhnawm a, amaherawhchu Real Madrid tlarhnung ṭhiah an harsat. Los Blancos pawhin chance an insiam thei bik lo a, minute 90 chhungin Benzema goal tih loh chu goal zawnah pet an nei lo. First half hmuhnawm tak phochhuah a nih hnuah coach pahnih an fimkhur avangin second half a hmuhnawm zui ta lo ti theih bawk.

A hmuhnawm dawn
Champions League a nih tawh chuan Real Madrid dah hniam theih an ni lo a, first leg-ah 1-1 a nih avangin second half-ah team pahnihin beiseina sang tak an nei ve ve ang. Stamford Bridge-ah Benzema bawkin mipui mit a la dawn a, first leg-a goal a khung avang hian UCL-a Real legend Raul-a goal khung zat goal 71 a nih rual a, a tluk loh chu Ronaldo, Lionel Messi leh Robert Lewandowski te chiah an ni.

Chutihrualin Chelsea-in manager ṭha Thomas Tuchel an nei a, German manager hian Los Blancos vawi nga a hmachhawn tawhah a la tlawm lo. Ṭum khat chiah chak nei mah se ṭum li an inhnehtawk a, Madrid-ah goal an khung miau avangin Stamford Bridge-a goal awm loa an inhnehtawk chuan final an lut dawn.