Arsenal hralh an tum lo

Premier League club Arsenal neitu Stan Kroenke leh a fapa Josh Kroenke te chuan North London club hralh tumna an nei lo tih an sawi chiang a, club tan an theihna 100% a hman chhunzawm an tum zawk.

American sumdawng hausain club an enkawl danah Gunners ṭantute an lawm lo, an duh loh thu vawi tam an au chhuahpui tawh a, tun hnai khan Emirates Stadium bulah fans 1000 chuang pung khawmin 'Kroenke' chu chhuak turin an duh thu an tarlang.

Club neitu leh fans inkara khi a awm lai tak hian, billionaire Daniel Ek-a chuan Arsenal hi lei a duh thu a lo sawi chhuak ve bawk. Spotify hmuchhuaktu hian Gunners legend Thierry Henry, Dennis Bergkamp leh Patrick Vieira te chu thawhpui turin a hmin tawh.

Swedish sumdawng hausa Ek hian American mi hausa Kroenke sum neih zat chu a nei phak lo hle, mahse Arsenal ṭantu a nih bakah fans lam hmin nan an legend-te thawhpuiah a sawm thiam a, thuneihna a neih chuan fans an pawimawh tur thu thlengin a sawi.

Mahse, Ek-a tan hriat tel ngai chu Kroenke hian an thil duh lai an hralh ngai lo. Tunah pawh an kal dan thlak tumna an neih hmel loh hle. Gunners neitute chuan thu chhuah siamin, "Lei tuma dawrna kan dang lo, dawng pawh ni ila kan ngaihven lo ang.

"Arsenal hi ti hmasawn tur leh, nomawi lian tham chawi tura hmalak chu kan thil tum a la ni reng," an ti. Hmasawn pui an tum thu sawi mah se fans erawh an lungawi rih lo, an kalphung thlak tumna lam chu an sawi lang tel hran lo a ni.

Kum 73 mi Stan Kroenke hian 2007 khan Arsenal-ah neitu nihna a nei ve ṭan a, a tirah chuan 9.9% chauh a ni. Mahse, zawi muanga midang ta lei chhawnsak zelin 2011 April thla a her chhuah meuh chuan 62.89% a nei tawh.

Arsenal bakah hian NFL club Los Angeles Rams leh NBA team Denver Nuggets an nei bawk. A fapa Josh chu Arsenal-ah hian director a ni a, club hnathawhna leh hmalakna hrang hrang a enpui ṭhin a ni.