Wimbledon an khel tlang tawh dawn

Tennis inelna ngaihhlut Wimbledon chu kuminah neih tlang ngei tum a ni a, kum 2022 aṭang chuan kalphung thlakin a kar hawl laia Pathianni bika an chawlh ṭhin chu an khel tlang tawh dawn.

Grass court-a khelh ṭhin inelna hi kar hnih chhung khelh an ni ṭhin, kar khatna a zawh hian Pathianni bikah an chawl, a hnuah kar khat dang an khelh chhunzawm leh ṭhin - ruahmanna tharah chuan chawlh hi a awm tawh dawn lo tihna a ni.

Grand Slam dang pathum - Australian Open, French Open leh US Open te chu chawl loin an khel tluan ṭhin. All England Lawn Tennis Club chief executive Sally Bolton chuan, "Fans duh danin kalphung hi chu kan thlak danglam fo," tiin major tournament dang kalphung an zui chhan a sawi.

Wimbledon hi grass a khelh a nih avangin tournament tir lam leh a tawpah a danglam ṭhin hle, final khelh meuh chuan grass a chhe tawh ṭhin. Chawlh awm lo hian grass dinhmun a tih ziaawm beisei a ni a, kar hnihna lama quarterfinal chin bichilh lutuk pawh hun thawl a awm theih an beisei bawk.

All England Lawn Tennis Club chuan kuminah a hmuna entu awm ngeiin tournament buatsaih an tum thu an tarlang nawn bawk. Stadium pakhatah 25% an awm thei turin ruahmanna an siam.

AELTC chairman Ian Hewitt chuan, "Mipui himna ngaihtuah chungin inelna buatsaih kan tum, kum danga Wimbledon kan khelh ṭhin dan nen erawh a inang lo deuh ang," a ti. Nikum khan hrileng vangin Wimbledon hi an khel lo, indopui pahnihna hnua an neih loh hmasak ber a ni hial.