Barca tan hmahruaina hun ṭha a inher chhuak

Spanish La Liga-ah champion thei team pali an la awm a, Atletico Madrid, Real Madrid, Barcelona leh Sevilla-ten nomawi chawi an la beisei vek.

Club pali zinga champion tura dinhmun ṭha ber chu Barcelona an ni mek - Catalan club hian zanin dar 10:30-ah league match khel turin Granada an mikhual dawn a, an chak chuan table chung ber an luah ang.

Barca hi top four zingah match khatin an khel tlem bik a, zaninah an chak chuan point khatin hmahruaitu ni lai Atletico Madrid chu an tlanpel thei dawn a ni.

December 2020 vela team talbuai tak khan tunah chuan champion an sawi ri leh ta a, tun hnaia indinthar tum tan Spanish champion nih hi a pawimawh - May 8-ah Atletico Madrid nen an la intawng leh dawn.

Barca harhna
Kum 2020 kha Barca tan chuan kum ṭha lo a ni. Coach thar Ronald Koeman hoin phur takin season bul an ṭan a, an league match hmasa pahnihah goal sarih ngawt khungin an lamah a lut lo.

Barca-in match hnih aṭangin point ruk an nei nghal a ni satliah lo a, inkhel an thunun hneh hle. Mahse, Barca fans lawm chhung a rei lo - league match li zet a zawnin an chak zo lo zui a, thawh an harsat hle.

Kum 2020-a league match 15 an khelhah vawi sarih chiah an chak a, vawi li an tlawm a, vawi li an khingpui an inhnehtawkpui - Barca tan league nomawi sawi rik chi a ni lo.

Mahse, kum 2021 a her chhuak a, football mawina kan hmu. Catalan club an insiamṭha a, kumina league match 17 an khelhah vawi khat chiah an tlawm a, vawi khat draw an nei bawk - match 15-ah an chak a, hmahruaitu ni thei dinhmunah an ding ta.

Kawng awlsam a ni lo
Granada hi hming langsar ni lo mah se Barca fan-ten awlsam taka chak tura an inngai a nih chuan an tisual ang - season thara European football khelh beisei an ni a, a awlsam dawn lo.

La Liga-a top four dinhmun luah mek ten season tharah Champions League an khel dawn tih a chiang tawh a, Europa League khel tur erawh a la chiang lo - table-a pangana leh parukna chu group stage khel turin an tling ang a, pasarihnain playoff aṭangin an ṭan thung ang.

Granada hi table-ah pariatna an ni mek a, match ruk khelh tur an la neihah an chung chiaha awm Villarreal chu point sarih chauhin an thlau. Zaninah Europe beseina chhi nung turin Barca hneh an tum dawn.

Kum 35 mi Roberto Soldado chu Granada tan striker rintlak a la ni reng a, Tottenham Hotspur striker hlui hian tun season inelna hrang hrangah match 40 khelin goal 14-a khung tawh a, assist vawi hnih a nei bawk - tawnhriat ṭha tak a neih hi a ṭangkai tel ang.

Messi tan...
Nikum nipui laia Messi-a'n Barca chhuahsan a dil kha thil thar a ni tawh lo a, season tawp ruala a contract hmang zo mai tur forward hian tun thlengin Barca-ah contract thar a la ziak lo.

Barca fan-ten Messi chan an hlau a, March thlatir lama club President thar thlannaah pawh Messi-a chelh tur thu sawitu Joan Laporta ngat an thlang tling. Mahse, tun thlengin Messi dinhmun a la chiang chuang lo a, Barca fan-te an hlauthawng!

Neymar-a'n Paris Saint-Germain-a pan dawna puang hmasa bertu journalist Marcelo Bechler chuan French champion hian Messi hi kum hnih, a ṭul dan a zira kum khat pawhsei theih turin contract an zawrh niin a tarlang a, PSG chuan an sum thehchhuah zat club dangin an thehchhuah theih an ring lo, niin a sawi bawk.

PSG leh Messi hian duh thuhmun an nei - chu chu Europe roreltu nih a ni a, Argentine forward hi Barca lakah a beidawng ṭan. Catalan club hian Copa del Rey nomawi an chawi tawh a, Messi 'meuh' chelh nan erawh a tenau deuh - hei vang hian Messi chelh an duh chuan league nomawi an chawi a ṭul.

Barca an ṭha
Han en mai chuan Granada lakah Barca tan harsa awm lo tur a ni a, mahse, football-ah chuan eng pawh thleng thei a nih avangin Barca tan fimkhur erawh theihnghilh loh a ṭha.

Tun hnaia inhliam langsar nei lo Barca tan Messi bawk chu player ṭangkai a ni leh dawn a, Argentine forward hian tun season inelna hrang hrangah match 42 khelin goal 33-a khung tling leh der tawh a, assist vawi 14-a nei bawk.

Antoine Griezmann tan season sawi vul chuk tur ni lo mah se a match hnuhnung pahnih aṭangin goal thum a khung a, a 'form' leh ṭan tawh - tun season inelna hrang hrangah match 45 khelin goal 18-a khung a, assist vawi 11-a nei.

Midfield-a Frenkie de Jong khelh ṭhat hi Barca tan chak tur chuan a ṭangkai leh dawn a, tun season match 46 aṭanga goal sarih leh assist vawi riat neitu hi a khelh ṭhat chuan tlarhmaah Messi leh Griezmann an hlauhawm leh sawt ang.