A tawp nan Goa inlan dawn

AFC Champions League group stage-a an match hnuhnung berah FC Goa chu zanin dar 10:30 hian an inlan dawn a, Al-Wahda nen an inkhel ang.

Goan club-in last 16 an luh theih tawh loh avangin an tan result-in danglamna a thlen tawh dawn lo a, chutihrual chuan Indian club zinga Champions League khel hmasa ber an nih avangin an result hian Indian football-ah nghawng thui tak a nei thei thung.

FC Goa hi an awmna group E-ah squad hlutna hniam ber an ni a, player leh club hlutna teh ṭhintu transfermarkt-in a teh dan chuan Goan club hlutna hi India pawisain vaibelchhe 38.1 chauh a ni.

An elpui Al-Rayyan (vaibelchhe 164), Persepolis (vaibelchhe 100) leh Al-Wahda (vaibelchhe 98.7)-te nen chuan an squad hlut zawng hi khaikhin chi pawh a ni lo.

Mahse, khelmualah erawh Goa an nau bik lo - goal khung loa Al-Rayyan leh Al-Wahda an inhnehtawkpui hnuah a zawnin Persepolis an ngam lo a, hei pawh vanduai vang tiin a sawi theih.

Persepolis nen an intawn hmasakah goal an khung hmasa chungin 2-1 in an tlem a, a vawi hnihnaah erawh player hrem bakah a ṭhen an chawlh hahdamtir avangin 4-0 in an tlawm thung.

Al-Rayyan nen an intawng leh a, hun tawp nan minute khat chiah a awm tawh tihah Qatari club hian an si phurh sutin 1-1 in an inhnehtawk - hei erawh an intawn hmain Al-Wahda chuan rin loh takin Persepolis chu 1-0 in an hneh a, Goa tan chak pawh ni se last 16 luh ngaihna a awm tawh lo sa.

Zaninah pawh Goan club inlan hmain zan dar 8:00-ah Persepolis leh Al-Rayyan an inkhel dawn a,

Al-Rayyan hian point thum an hlawh chhuak thei a nih chuan Al-Wahda tan Goa hnehin group hmahruaitu a la nih theih.

Al-Rayyan hi chak ta se Goa tan ṭan a na lehzual sawt ang - French legend Laurent Blanc-a enkawl team an chak chuan FC Goa tan table mawngphaha awm chunga Champions League mangṭha a theih dawn tihna a ni a, Goa mai ni lo India tan mualphona a ni dawn.

Hetihrual hian Al-Wahda hian Goa hi ngam lo pawh ni se, pahnihna an ni chiang tawh a, West region aṭanga pahnihna ti ṭha pathum zinga tel chungin last 16 an la lut thei - tun dinhmunah chuan West region-a pahnihna zingah anni aia point hmu sang an awm lo.

AFC Champions League-ah hian team 40 an inel a, group 10 (A-J) ah ṭhen an ni a, group hi west region (A-E) leh east region (F-J) ah ṭhen leh an ni. Group tina pakhatna ṭheuh chu round of 16 lut chiang an ni a, region pahnih aṭanga pahnihna ti ṭha pathum ve vein knockout round hi an lut dawn bawk.