NFL player hlui Geno Hayes-a thi

National Football League (NFL) player hlui Geno Hayes chu Thawhṭanni khan thin ṭha lo vangin a thi a, kum 33 mi a ni.

NFL club Tampa Bay Buccaneers, Chicago Bears leh Jacksonville Jaguars tana linebacker ni ṭhin Hayes hian kum 2014 hnuah khan NFL-a khel leh tawh lo.

Florida tlangval hian thla hmasa khan a thin thlak tura an inruahman thu a lo sawi tawh a, NFL-a khelh laia nachhawkna hmanga a inchiu ṭhinna chuan a thin lamah hna a thawk nia a hriat thu a lo sawi tawh bawk.

Hayes chuan, "A tirah chuan zu vanga thin ṭha lo angah min ngai a, mahse, kan en chian hnuah zu vang a ni lo tih kan hria. Taksa tichhe khawpin zu ka in ngai lo a, wine aia sang hi ka in meuh lo a ni," tiin ESPN-in an kawmnaah a sawi a ni.

Hayes-a career ṭanna Tampa Bay Buccaneers chuan, "Geno thihna hian min ṭhawng takzet a, khelhpui nuam tak player, mipui vantlang tana hna kan thawhna kawnga rawn pen chhuak hmasa ber ṭhin a ni.

"School tlawh ṭhinin naupangte ngainat pawh a hlawh em em a, kum naupangte nichunga kan chan mai hi na kan ti takzet a ni," tiin an player hlui chu an thlah.