Old Trafford-a lenglut tur Roma

Ole Gunnar Solskjaer hnuaiah Manchester United-in nomawi chu sawi loh final an la thleng lo a, Norwegian manager tan Europa League hi nomawi chawi theihna hun ṭha a ni.

Zanin dar 12:30 hian Old Trafford-ah Man United hian Italian club AS Roma an mikhual dawn a, Europa League semifinal first leg hian ngaihven a hlawh ang.

Thawnthu hlui
Manchester Untied ṭantute chuan tun ṭum semifinal avang hian April 2007-a Old Trafford-a thil thleng kha an hre chhuak leh ngei ang. Sir Alex Ferguson-a enkawl Man United chuan Rome-ah 2-1 a an chak loh hnuin Old Trafford-ah Francesco Totti leh Daniele De Rossi telna Roma team hi an mikhual.

UCL quarterfinal second leg-ah hian tun ṭuma Man United manager Solskjaer hi bench-ah dah a ni a, assistant manager Michael Carrick-a'n hmun pawimawh a chang.

United-in bul an ṭan ṭha a, Carrick-a'n minute 11-na lekah a khung nghal. Minute ruk hnuah Solskjaer aia lut Alan Smith-a'n a khung leh bawk a, Old Trafford-a entu mipui an lam suau suau theih nan a khat mawi tawkin United-in an ti goal. Second half-ah Solskjaer pawh rawn lutin Patrice Evra goal khung tur a siamsak a, 7-1 in an hnehna an chang.

Hemi hnu hian Man United hian Roma hi ṭum li an hmachhawn leh tawh a, ṭum thum hnehna changin vawi khat an inhnehtawk. An intum tawhna thlirin Man United hi chak tura rinkai zawk an ni.

Team chhe zawk?
Roma hian semifinal lut turin quarterfinal-ah Ajax an hneh a, Eredivisie-a champion mai tur Ajax hi an vanduai. Dutch club hian an muala first leg khelh a nih ṭumin inkhel an thunun a, goal pawh an khung hmasa. Amaherawhchu Dusan Tadic-a'n penalty a hlah hnuah Roma-in beiseina an nei a, Lorenzo Pellegrini leh Ibanez te goal hmangin 2-1 in an lehthal.

Second leg-ah pawh Ajax an chungnung zawk a, goal pawh khung hmasa mah se Roma-in Edin Dzeko hmangin siphurh an sut a, 1-1 in an inhnehtawk. Italian club hi aggregate-ah 3-2 in chak mah se team ṭha zawk chu Ajax an ni a, Man United an vanneiah a ngaih theih.

Serie A lamah pawh Roma hian match thum chhung chak hmel an hmu tawh lo a, match hnuhnung berah Cagliari lakah 3-2 in an chak lo. Amaherawhchu Europe inelna a nih tawh chuan Italian club hi zuam chi an ni ngai lo.

Manchester United midfielder hlui Henrikh Mkhitaryan-a'n tun season match 39 aṭangin goal leh assist vawi 11 ve ve a nei tawh a, tlarhmaah club top scorer Spanish forward Borja Mayoral bakah Manchester City striker hlui Edin Džeko leh French midfielder Jordan Veretout te an awm bawk.

Tlarhnungah kar ruk a chawlh hnuah United defender hlui Chris Smalling a inlan leh thei tawh a, amaherawhchu Chelsea winger hlui Pedro leh Italian midfielder Nicolo Zaniolo an inhliam bakah hrem vanga centre back Gianluca Mancini an chhawr thei dawn loh avangin an ṭhat dan berin an inlan thei dawn lo.

United hi...
Manchester United erawh inhliam vangin Anthony Martial an chhawr thei dawn lo tih loh chu an inlan thei vek dawn a, second leg-a hna a awlsam nan Old Trafford-a chak ngei ngei a pawimawh dawn.

Semifinal-a Granada nen an inhmachhawn ṭuma hrem vanga inlan lo Harry Maguire, Luke Shaw leh Scott McTominay te an inlan vek thei dawn. Premier League match-ah Dean Henderson-a'n goal venhim hna a thawk a, Europa League lamah David de Gea a inlan a rinawm.