Bangalore run khatin an chak

Indian Premier League khelh mekah Royal Challengers Bangalore chuan Thawhlehni zan khan run khatin Delhi Capitals an hneh.

Narendra Modi Stadium-a inkhelah Delhi Capitals-in vawm hmasak an thlang a, Banglore-in AB de Villiers-a'n thi loa run 75 a siam zarah run 171/5 an siam.

Delhi Capitals tan target hi umphak theih a ni a, top order-te che ṭha lo mah se Rishabh Pant (58*) leh Shimron Hetmyer (53*) te an chet ṭhat zarah ball tawp ber thlengin chak beiseina an nei.

Over khat chiah a awm hian Delhi-in run 158/4 an siam a, chak turin 14 an mamawh. Mohammed Siraj-a'n vawmin ball hmasa paliah run li chauh a pe a, mahse ball ngannaah Pant-a'n four a vua, ball tawp berah chak turin six run vuak a la ngai. Delhi captain Pant hian four chauh a vuaksak theih avangin run khatin an vanduai.

Vawiin tlai dar 3:30 hian Mumbai Indians leh Rajasthan Royals te Feroz Shah Kotla, Dehli-ah an inkhel ang a. Zanin dar 7:30 hian Delhi Capitals-in Narendra Modi Stadium-ah Kolkata Knight Riders an hmachhawn lehnghal ang.