Arsenal hmaah Emery-a Villarreal

Europa League nomawi chawi mai loh chu Arsenal tan in chhandamna kawng a awm tawh lo. Champions League ticket an lak theihna hnai ber thleng tur chuan an manager hlui Unai Emery enkawl Villarreal an hneh a ngai dawn.

Zanin dar 12:30 hian Europa League semifinal khel turin Gunners hi Villarreal khelmualah an lenglut dawn. Spanish manager pahnih Mikel Arteta leh Emery te tan fiahna a ni dawn a, final luh tumin an fimkhur dun hle ang.

Amah thlaktu
Arsene Wenger thlaktu chu Emery a ni a, Spanish manager hian beisei angin Emirates Stadium-ah hlawhtlinna a chang lo; a hnam pui Arteta-a'n a rawn thlak chhawng ve leh a, tun thleng chuan a hna thawh danah fakna tur a la awm teh chiam bik lo.

Arteta chuan, "Arsenal nen kan inbiak lai khan Emery hi ka va be rawn. Ani hi a hna thawhna kawnga tih takzet chhuah ṭhin a ni a, Gunners enkawl chu thil ṭha a nih thu min hrilh," tiin player a nih laia a khelh tawhna a enkawl hma boruak a sawi.

Gunners captain hlui chuan sawi zawmin, "Emery hi manager ṭha tak, hun rei tak chhung inelna sanga ṭha taka a naute lo kaihruai tawh a ni. A bikin Europa League lama a sulhnu hi en ila, tawnhriat a nei ṭhain hna a thawk ṭha hle," tiin a khingpui tur manager a fak.

Rintlak Emery
Sevilla a enkawl laiin Emery-a'n Europa League nomawi vawi thum a chawi tawh, kuminah hian a champion leh thei a nih chuan Jose Mourinho, Bob Paisley leh Giovanni Trapattoni te angin Europe inelnaa vawi li champion thei a ni ang.

Emery chuan, "Hlawhtlin ngei kan duh, chumi tur chuan kan ṭhat dan bera kan khelh chhuah a ngai dawn. Kum khat leh thla nga chhung ka lo enkawl tawh Arsenal ka ngainatna kha chu tunah hian dahbo rih a ni ang, zah tak chunga hneh kan tum dawn.

"Manager ṭha tak an nei, an manager hi Arsene Wenger a kaihhruai tawh a ni a, a hnuah Pep Guardiola nen an thawkdun leh. An khelh fuh ni chuan football hmuhnawm an chhawp chhuak ṭhin, mahse keini pawhin chutiang chu kan ti ve thei," tiin a inringtawk hle.

Saka chhertu
Arsenal-in season duhawm an hmang lo, league lamah phei chuan a sang pali zinga tel chu beisei ngam chi pawh a ni tawh lo. Player hrang hrang a khelh ṭhat loh laiin Bukayo Saka erawh England tana koh hlawh khawpin a khel chhuak thung.

Emery chuan, "Ka la hre reng mai, kum 2019 January 1 khan Fulham nen kan inkhel a, a tawp lam minute riat vel a la awmah Saka chuan a vawi khat nan Premier League a khel, ball erawh a tawk hman lo.

"Theihna a nei sang tih ka hria a, tunah chuan a nihna tak a pholang mek tawh a ni. Ani bakah hian Gabriel Martinelli chevel ka hmuh hian ka lo lawm ṭhin," a ti, a player chher chhuahte hi dan tumin Villarreal tlarhnung a rem a ngai tawh thung dawn.

Mari te vengah
David Luiz hliam a la dam lo a, tlarhnung laiah Pablo Marí a pawimawh dawn. Spanish defender hi Almussafes, Spain-a piang a ni. Zanina an inkhelhna tur Estadio de la Ceramica leh an chenna hmun a inhlat lo, a naupan lai chuan Villarreal a ṭan ṭhin.

Kum 27 mi Mari chuan, "Ka naupan lai chuan Villarreal tana khelh phak ka chak ṭhin hle, tunah erawh Arsenal player ka ni. Club ngaihsan ṭhin tak nena kan inkhel tur hi a phurawm viau, a tawpa hlim zawk kan nih ngei ka beisei tlat.

"Europa League semifinal hi kan tan eng anga pawimawh nge a nih chu sawi nawn a ngai lo, kan khingpui tur tan pawh a pawimawh hle. Ka chhungte hi Villarreal ṭantu ni mah se, tun ṭuma kan inkhelh tur bikah chuan Arsenal an ṭan ang," a ti.