Man City-in Paris khawpui an luhchhuah
Neymar leh Kylian Mbappe te vawk lal lenna Parc des Princes-ah Manchester City an leng lut a, Pep Guardiola hoten 2-1 in an luhchhuah.
City dinhmun hi ṭha tawh hle mah se minute 90 khelh tur a la awm avangin Champions League final khel tur a la chiang lo - May 4, Thawhlehni zan hian Etihad Stadium-ah an khelh chhunzawm ang.
Nilaini zan Champions League semifinal first leg-ah hian PSG-in captain Marquinhos hmangin goal an khung hmasa a, mualneitu hi first half-ah an khel ṭha zawk bawk.
Second half-ah Manchester City dang daih an rawn inlan a, Kevin De Bruyne leh Riyad Mahrez te goal hmangin an lehthal. PSG midfielder Idrissa Gueye chu minute 77-naah hnawhchhuah a ni a, French club hian player 10-a an khelh hnuah goal an chhuah tawh lo.
Poch-a player thlante
Mauricio Pochettino-a'n bul ṭantu zingah Neymar, Mbappe leh Angel Di Maria-te a rawn dahlut nghal ṭhawt. Tlarhnungah inhliam vanga dinhmun chiang lo Marquinhos-a'n a rawn ho thei bawk a, goalkeeper Keylor Navas a awm bawk avangin PSG player ṭha an kim thawkhat.
PSG hian champion lai Bayern Munich an hneh tawh avangin inrintawkna an ngah a, Premier League club zinga tlarhnung phui ṭha ber leh Champions League-a goal thum chiah la chhuah Man City tlarhnung fiah turin an inpeih.
Striker nei lo
Pep Guardiola-a'n forward a neih pahnih Sergio Aguero leh Gabriel Jesus-te chungah rinna a nghat ngam tawh lo a, club legend Argentine forward phei chu a contract a zawh avangin season tawp rualin a chhuak dawn. Spanish manager hian bul ṭantu zingah forwad pahnih bakah hian Raheem Sterling a telh lo.
Man City khelh dan phung hre chiang tan erawh chuan thil nih dan tur a ni zawk. Tlarhmaah Riyad Mahrez, De Bruyne leh Phil Foden-te an awm a, midfield-ah Bernardo Silva, Rodri leh Ilkay Gundogan te awmin 'striker' mamawhah an inngai lo.
Ruben Dias-a kawppui tur pawh chinfel a ni a, League Cup final-a goal awm chhun khungtu Aymeric Laporte aiin John Stones-a'n rin a hlawh zawk.
Guardiola-a'n Germany-a Borussia Dortmund hnehtute aṭanga a thlak danglam chu left back chiah a ni a, Oleksandr Zinchenko aiah Joao Cancelo a lut.
PSG hun
Man City-in Guardiola hnuaiah UCL semifinal an la khel ngai lo a, an vawi khat khelhnaah an talbuai deuh.
Premier League thununtu Man City aiin nikum UCL finalist PSG-in bul an ṭan ṭha zawk. Mbappe leh Neymar-te inkawpin City tlarhnung an tibuai nghal a, amaherawhchu Brazilian forward ball pet hi a nat tawk loh avangin Ederson-a'n awlsam takin a dang.
Pep-a nauten ball inpe kual ve bawk mah se PSG tlarhnung tan an hlauhawm pha lo a, French club erawh goal hmaah an hlauhawm hle. Neymar-a'n tlangnel takin Man City box chhungah ball a khawih ngam a, keeper Ederson-a'n a dan ṭhat avangin scoresheet-ah a hming thai lan a ni lo thung.
Set piece-ah PSG an hlauhawm a, minute 15-na lekah Di Maria corner pet chu Marquinhos-a'n ṭha zetin a tauh goal. PSG captain hi amah vengtu Gundogan lak aṭangin a tal put ṭha a, vengtu nei loin a tauh lut.
French club hi corner-ah an hlauhawm zui a, amaherawhchu goal dang hmuh tur a awm ta lo. PSG khel ṭha mah se Mbappe erawh a reh ang reng hle.
Man City hi first half-ah an buai a, an chance neih ṭhat ber chu Foden-a pet chu goal laiah a pet avangin Navas-a'n a dansak.
Man City hun
Guardiola-a'n halftime a hmang ṭangkai a, semifinal boruaka talbuai a naute hnenah thu ṭha a hrilh. Second half-ah Man City dang daih an rawn inlan - ball an chan leh chan loh pawhin an khingui an nawr nâ a, PSG tan ball channa hun an pe lo a ni ber.
Man City goal an thun ta a, 'vanneih goal' a ni ber - minute 61-naah Cancelo aiah Oleksandr Zinchenko a rawn lut a, vanneihna a rawn keng tel. Minute thum hnuah Zinchenko pass chu Ke De Bruyne-a'n box pawn aṭangin a vawrh lut a, keeper Navas-a'n chhut sualin goal-ah a lut!
KDB hian inkhelh zawhah goal chu 'vanneih goal' a nih thu a pha bik lo a; amaherawhchu an ball press nat rah chhuah a ni.
City tan Foden a ṭangkai a, a freekick hlawhchhuah chu minute 71-naah Mahrez-a'n a pet goal - a hma lawka si khat phurtu mikhualin 2-1 in hma an hruai.
PSG-in wall an siam a, lei hrula kal dang turin pakhat a bawk a, an hmaah City-in wall hranpa an siam leh bawk. PSG wall hi a pawp a, Mahrez-a freekick hi wall-a dingte dan tur ni mah se a kaw laiah tak a luh avangin Navas-a tan dan hman ngaihna a awm lo.
Second half-ah Neymar a zuih a, Dias leh a hoten PSG chhuanvawr Brazilian forward leh Mbappe te an dah ṭha.
French club harsatna belhchhah turin Everton midfielder hlui Idrissa Gueye-a'n chiang zetin Gundogan a tlawh a, hnawhchhuah a ni.
Man City-in goal dang khung turin hun an nei a, Foden-a'n ṭha taka a lakluh hnuah keeper Navas zawnah chiah a pet. English club-in an tamna an hmang ṭangkai thei lo a, 2-1 chauhin hnehna an chang.
Hetihlai hian PSG tan final lut turin City khelmualah goal hnih thun ngei ngei a ngai ta a ni.
UCL Semifinal
First Leg - April 28, Nilaini zan
Paris St-Germain 1 - 2 Manchester City
PSG : Marquinhos 15'
MAN : Kevin De Bruyne 64'; Riyad Mahrez 71'
MoM : Kevin De Bruyne, Man City
Venue : Parc des Princes
Player Inlante
PSG: Navas; Florenzi, Marquinhos, Kimpembe, Bakker; Gueye, Paredes (Herrera 83); Di María (Danilo 80), Verratti, Neymar; Mbappe
Man. City: Ederson; Walker, Stones, Ruben Dias, Joao Cancelo (Zinchenko 61); Rodri, Gündogan; Mahrez, De Bruyne, Foden; Bernardo Silva
Second Leg : May 4, Thawhlehni zan
Manchester City 12:30 AM Paris St-Germain
Venue : Etihad Stadium
Eng nge an sawi?
A chang hi chuan hahdam zawka khelh a ṭul ṭhin. Second half-ah khan kan nawr dan kan thlak. Neymar, Mbappe leh Di María te awmna team hmachhawn chu a awlsam lo. Kan khelh dan a lungawithlak. Kan club hian tun ang hunah hian tawnhriat kan nei tam lo a, chuvangin second leg-ah pawh hian kan nihna anga kan khelh leh tawp a ṭul. Kan nihna ang tawpin kan ṭha a, thlak danglam thei kan ni lo. - Josep Guardiola, Man. City manage
First half-ah khan hmanhmawh lutuk a, team angin kan tih tur ang kan ti lo. Second half-ah erawh dawh thei takin hmun awl kan zawng a, nasa takin hma kan sawn. Kan khingpuite an ṭhiat miau avangin talbuai lai kan nei dawn tih chu kan hre sa a, chutihrualin chak turin theihna kan nei tih kan hre bawk. Second leg-ah pawh a danglam lo ang. - Kevin De Bruyne, Man. City midfielder
Goal hnih kan chhuah dan kha pawi kan ti hle. Semifinal-a thil thlengah chuan pawm thiam a harsa a, a na kan ti takzet. Second half-ah kha chuan keini aiin an nghelnghet zawk a, kan khan lo deuh. Keini aiin tharum an ngah zawk a, ball kan chhuhsak thei meuh lo a ni. - Mauricio Pochettino, PSG manager
Hnehna kan chang lo a, inkhel erawh kan la zo lo. Kan team-ah rinna ka nghat a, tun ai hian kan khel ṭha thei tih ka hria. 1% chance leh 99% rinnain Paris kal zel ang. - Neymar, PSG forward