Playoff khel tur Phoenix Suns

Phoenix Suns chuan tun hnai kum 11 chhunga a vawi khat nan NBA playoff an khel dawn. Suns hian nimin zing khan Los Angeles Clippers chu 109-101 a hnehin playoff khel tur hian an dinhmun an ti chiang ta a ni.

Suns an chak theih nan point 28 neitu Chris Paul a pawimawh leh hle. Paul hian a point neih zinga 15 chu quarter hnuhnung ber bika a neih a ni a, tun season chhunga a vawi khat nan Clippers hi an hneh.

NBA team nilai zingah Sacramento Kings chu playoff khel loa awm rei ber an ni. Kings hian 2005-06 khan playoff an khel a, a hnu lamah an khel leh tawh lo - anni dawtah chuan Suns (2009-10) hi a nghak rei an ni.

Suns forward Cameron Johnson chuan, "Tun hnai season kan hman dan ka thlir kir a, hetiang dinhmun kan thleng ve thei ta mai hi a mak ka ti zawk hle. Suns ka zawm khan mi chuan beisei nei loah min ngai, tunah chuan playoff kan khel dawn ta si," a ti.

Inkhel dangah Western Conference hmahruaitu Utah Jazz chuan Sacramento Kings lakah 154-105 in hnehna an chang; Jazz hian NBA regular season an khelh tawh chinah match khata point an neih hnem ber ṭum an tawng.

Philadelphia 76ers pawh playoff khel turin an tling. 76ers hian Atlanta Hawks lakah 127-83 in hnehna an chang a, regular season kal laiah vawi 41 an chakna chiah a ni - Eastern Conference lamah pahnihna dinhmun an luah.

NBA champion lai Los Angeles Lakers an chefuh hleithei lo. LeBron James tel loa khel Lakers hi Washington Wizards lakah 116-107 in an chak lo. Wizards tan hian Russell Westbrook chuan triple-double (18 point, 18 rebound leh 14 assist) a nei.

NBA-ah hian conference pahnih a awm, conference pakhatah hian team 15 awmin, regular season a tawpah a sang pariat chinin playofff an khel ṭhin. Conference champion an zawng a, chumi hnuah NBA champion an zawng leh ṭhin.