London Football Awards : Manager ṭha ber David Moyes

London Football Awards 2021 chu Thawh-lehni zan khan online hmangin semchhuah a ni a, West Ham manager David Moyes chu London khawpuia manager ṭha ber atan thlan a ni.

Premier League-a rele-gation battle hmachhawn ṭhin Hammers hi Moyes-a hnuaiah Champions League beisei phakin an awm mek a, table-ah pangana niin palina Chelsea chu match nga khelh tur la awmah point thum chauhin an phak lo mek.

December 2019-a Hammers a enkawl hnua a hming chher thar leh mek Moyes-a hnathawh hi LFA lam buatsaihtuten an hmuh hmaih lo a, London khawpuia football coach ṭha tak tak zingah a aia ṭha thlan tur an hre lo.

Moyes hian he award dawng tur hian Chelsea hmeichhe team coach Emma Hayes, Fulham boss Scott Parker, Championship club Brentford coach Thomas Frank leh Crystal Palace manager Roy Hodgson-te a khum a ni.

Tottenham Hotspur striker Harry Kane chu Premier League Player of the Year-ah thlan a ni a, Arsenal rawlthar duhawm, kum 19 mi Bukayo Saka chu Young Player of the Year-ah thlan a ni bawk.