Chennai Super Kings an chak zel

Nilaini zan khan Feroz Shah Kotla, Delhi-ah Chennai Super Kings-in wicket sarihin Sunrisers Hyderabad an hneh.

Indian Premier League khelh mekah Chennai hian match ruk an khelh tawh aṭangin point 10 an hmu a, an point hmuh ang zat hmu Royal Challengers Bangalore aia an net run rate a ṭhat avangin pakhatna dinhmun an luah mek.

Chennai leh Hyderabad inkhelh ṭumah hian ṭhumvawrah Sunrisers an vannei a, vuak hmasak an thlang. Opener David Warner (57) leh Manish Pandey (61) te half century hmangin Hyderabad-in run 171/3 an siam.

Chennai Super Kings tan target hi awlsam ni lo mah se opener pahnih Ruturaj Gaikwad (75) leh Faf du Plessis (56) te an che ṭha a, harsatna hranpa nei loin over 18.3-ah 173/3 run siamin hnehna an chang.

Zanin dar 7:30 hian Narendra Modi Stadium-ah Punjab Kings leh Royal Challengers Bangalore te an inkhel ang.