Madrid Open lamah Osaka

Tun kar tawp aṭangin Madrid Open an khel dawn, hmeichhe world number 2 Naomi Osaka chuan kum danga beisei a phak lohna clay court chungah nomawi chawi tura theihtawp chhuah ngei a tum.

Japanese nula Osaka hian clay court inelnaah nomawi a la chawi ngai lo. Grand Slam title pali a lak tawh chu hard court-ah vek a ni a, atan clay leh grass hi hmun ṭha a ni lem lo - French Open bikah phei chuan third round a la paltlang lo.

Osaka chuan, "Miami Open kan khelh zawh aṭang khan ka chawl a, tunah chuan ka rilru leh taksa a hahdam thawkhat tawh. Australian Open hnuah chawlh mumal nei loin ka inkhel kual a, chuvangin chawlh neih kha chu ka mamawh.

"Krismas hnuah ka chhungte hmu loin ka awm vang vang a, tun hnaiah Florida-ah chhungkua a hun kan hmang thei kha ka lawm. Rilru engthawl leh zanlen taka awm hnuah inkhelh leh hi a nuam ṭhin," a ti.

Madrid Open-ah hian a match hmasa berah Osaka-i'n a hnampui Misaki Doi a hmachhawn dawn, final kalkawngah player ṭha - Simona Halep, Venus Williams leh Victoria Azarenka te a hmachhawn thei dawn a, kawng a awlsam lo ang.

Osaka chuan, "Player dangte pawhin inkhelh harsa tihna hmun an nei vek, kei ngei pawh clay court-ah ka la hlawhtling ngai lo. Kumin erawh beiseina ka nei sang ve hle a, player ṭha dangte nena inel hi a nuam ka ti ṭhin.

"Rilru lam a inpeih miau chuan ṭha taka khelh a awlsam bik. Season kal laiah hian kum danga ka la tawn ngai loh thil ṭha leh thar eng emaw tal chu tawn theih ngei ka inbeisei tlat a ni," tiin a sawi.