Premier League TV rights a ngai anga kalpui tum

English top flight league, Premier League club-te chuan an inkhel live-a pekchhuah theihna dan awm sa chu kaltlangpui an duh a, auction hranpa awm tawh loin Sky Sports, BT Sport leh Amazon-te nena inremna an neihsa chu kaltlangpui an duh a ni.

Premier League TV rights kalpui lai hi kum 2022 thleng daih tur a ni a, kum 2019 khan Premier League chuan broadcasting channel larte hi inremna neihpuiin, pound tluklehdingawn 4.7-in inremna an lo ziak tawh.

Thla tharah khian dan ang chuan Premier League chhuah chhawn phalna hi lilam leh tur a ni a, mahse, tuna a lan dan mai chuan chhuah chhawn phalna neisate bawk hian an chang leh dawn niin a lang.

Inremna chu
Kum 2018 khan Premier League broadcasting rights hi Sky Sports, BT Sport leh Amazon-ten an lei a, BBC chuan Covid-19 vanga inkhel en theih loh a nih lai khan an pe chhuak ve bawk.

Tuna inremna awm mekah hian Premier League chuan pound tluklehdingawn 4.7 an dawng a, hei hi club-ten an insem ve leh a ni - kum 2019 aṭangin hman ṭan a ni a, kum 2022 thleng daih tur a nih avangin kum li chhung atan an inrem tihna a ni. Hetihlaia an inremna hi tam viau angin lang mah se, 2016-19 inkara pound tluklehdingawn 5.14-a inremna aṭanga chhut chuan 10% in a tlahniam.

Premier League match pekchhuah turte hi package-a ṭhen an ni a, A, B, C, D, E, F leh G-ah ṭhen a ni a, package A-ah hian kartawp match lei tur a awm a, chutiang zel chuan a hlutna indawta siam rem a ni - hei hi rights leitute hian an lei ngam ang zelin an insem.

Tichuan...
Covid-19 in nasa takin infiamna khawvel a nghawng a, sumdawnna dangah pawh ṭum dang zawng aiin sum che vel a tlem a, khawvelin a tuar takzet - hei hi Premier League hruaitute pawhin an hai lo a, hei vang hian broadcasting rights inremna awmsa hi kaltlangpui an duh a ni ber.

Dan awm sa angin Premier League hian thla tharah broadcasting rights lilamna hun nei ta se, broadcasting channel tam tak chu sum lamah an tlahniam ve tho si a, Premier League hian tuna inremna an neih sa sum ang pawh hi hmuhchhuah loh an hlau a ni.

Hei vang hian Premier League chuan Sky, BT leh Amazon-te chu an inremna awm sa anga inremna neihpui leh mai tura sawmin inbiakna an neihpui a, he thu buatsaih a nih lai hian Premier League leh broadcaster lam hian engmah sawi an la nei lo thung.

Mahse...
Sum inrawlh a tam miau a, broadcasting rights hian ngaihven a hlawh lo thei lo. Premier League leh broadcaster pathum lam hi lo inrem thei ta pawh ni se paltlang tur tam tak a la awm dawn.

Premier League broadcasting rights neih duha lo nghak broadcasting company dang zingah an lo awm ve thei a, heng ho hian an duh chuan thubuaiah lain Premier League hi an cho daih thei.

Hei mai bakah Premier League hian anmahni duhthuin thutlukna an siam ngawt thei lo - sorkar lamin an ruahmanna hi a pawmsak ve phawt a ngai a, United Kingdom sorkar chuan he thil hi an ngaihtuah mek.

Engtin nge?
Premier League leh Sky, BT leh Amazon-te hi an inrem thei a nih chuan company pathumte hian season thum, 2022-2025 inkar chhung atan broadcasting rights hi an nei thei ang.

English top flight league chief executive Richard Masters chuan Covid-19 vanga season hnih chhunga club-te sum hloh tur chu pound tluklehdingawn hnih vel a tlin tur thu a lo sawi tawh a, broadcasting deal awm sa hi an kaltlangpui theih hlauh chuan club tam zawk chu an thaw huai ang.

Thla hmasa khan Italian top flight league, Serie A chuan 2021-2024 chhung atan sports streaming service DAZN chu inremna an lo neihpui tawh a, euro tluklehdingawn 2.5-a an inremna hi a hmaa an broadcasting deal aṭanga chhutin 20% in a tlahniam - hetianga tlakhniamna hi Premier League chuan tawrh loh hram a tum a ni ber.