Arsenal lei ka duh takzet - Daniel Ek

Spotify neitu Daniel Ek-a'n Arsenal chu lei ngei a duh a, English club lei a tumna chu fans laka tlaktlum tumna leh boruak siamna chi khat mai a ni loh tih a sawi nawn.

Gunners neitu Stan leh Josh Kroenke ten club hralh dilna an dawn loh thu leh, dawng pawh ni se hralh tumna an neih loh thu an sawi a. American sumdawng hausa an ṭawng chhuah hnu lawkah Daniel hian thawm a rawn nei zui leh zat.

Pound tluklehdingawn 3.38 neitu Daniel chuan, "Ka ti takzet a sin, club neituten an hralh phalna tur ang zat hi chu ka nei thei ang, anni pawhin min ngaihven ngei ka ring," tiin beisei a neih thu a sawi.

Swedish billionaire hian Arsenal leina tur zat sum chu a nei ang, a enkawl zui nan engzat nge hman a phal dawn tih erawh hriat a ni lo. Fans lamin chhuak turin Kroenke chhungkua an nawr, an inkara khi a awm lai takin Daniel hi a rawn lang.

Kum 38 mi Daniel Ek hian 2006 khan Spotify a hmuchhuak a, tun thlengin chief executive officer a ni chhunzawm. Zai ngaihhtlakna Spotify hi mi maktaduai 180-in an hmang mek a, an zinga maktaduai 87 zetin pawisa chawiin an hmang a ni.