Champion nomawi ka duh - Kane

Tottenham Hotspur striker chhuan-vawr Harry Kane chuan champion nomawi chawi ngei a duh thu a sawi a, English striker thusawi hian khawthlang media titi a luah nghal.

Spurs hian Pathianni zan khan League Cup final-ah Manchester City chu 1-0 in an ngam lo a, kum 27 mi striker hian a career-ah nomawi chawi a la nei lo.

Kane chuan, "Nomawi langsar tak tak chawi theih ka duh a, mahse, chutiang chu kan ti si lo," a ti a, London club-ah an player chhuanvawr hi a beidawng ve ṭan ta tiin a sawi theih.

English striker hian Spurs-ah kum 2024 thleng cham turin contract-a nei mek a, mahse, tuna a ṭawngkam aṭanga teh chuan Kane hi London club-ah rei tak a cham kher tawh lo ang.

Aw, kar a hla!
England tan vawi 53 inlana goal 34 khung thei Kane hian mimal chawimawina lam chu tam tak a kawl - PFA Team of the Year-ah ringawt pawh vawi li a lang tawh a, PFA Young Player of the Year (1) leh PFA Fans' Player of the Year (1) ah thlan a ni tawh bawk.

Mahse, nomawi hunna lam en erawh chuan Kane hian chhuan tur a nei lo - League Cup final vawi hnih a khelh tawhah a tlawm zawkah a ṭang ve ve a, Champions League 2018-19 final-ah Liverpool an ngam lo bawk - nomawi a la hla rih hle.

Thawhlehni zan khan London Football Awards chu sem a ni a, he hunah hian Kane chuan Premier League Player of the Year chawimawina a dawng - mahse, English striker lawm nan a tling tawk lo.

Kane chuan, "Mimal chawimawina dawn hi a hlu ka ti a, hlawhtlinna ropui tak a ni. Ka career ka thlir kir hunah pawh ka hlut ngawt ang. Mahse, player kan nihna anga pawimawh ber erawh nomawi a ni," a ti.

Mimal lawmman ai chuan...
FIFA World Cup Golden Boot meuh a dawng tawh a, kum 2018 World Cup Dream Team-ah hial a tel - mahse, heng zawng zawng hian Kane tan nomawi a keng tel chuang lo.

Kane chuan, "Team tan nomawi chawi a, mimal lawmman lak bawk hi ka duh chu a ni a, mahse, hei hi thil awm dawn chu a ni miau si," a ti a, nomawi chawi duhna a thinlungah a awm reng.

English striker hian tun season inelna hrang hrangah match 44 khelin goal 31-a khung a, assist vawi 16-a nei bawk - a nep lo hle.

Kane chuan, "London Football Awards-a mimal lawmman ka dawng thei hi ka lawm takzet a, season duhawm tak ka hmang a ni. Theihtawp chhuahin ka khelh ṭhat hi chhunzawm zel ka tum ang," a ti.

Kane hian 2015-16 season hnuah khan season khata goal 20 aia khung tlem a nei ngai lo a, London club tan match 331-a khelhah goal 219 khungin assist vawi 46-a nei.

Mimal ang chuan an career-a nomawi la chawi miah lo zingah Kane tluka nomawi chawi phu an awm lo mai thei - mahse, kum 27-ah pawh he striker hian nomawi chhuan tur a la nei lo. Hei hi a buaithlak lai chu a ni.

Kane-a'n nomawi chawi ngei a duh thu a sawi a, mahse, Spurs-ah chuan he nomawi hi a chawi kherin a rinawm loh. Media ṭhenkhat chuan Kane-a ṭawngkam hi chhuah duhna ang hialah an ngaihsak a, a pan tur an inrinsiak zui.

Premier League-ah Spurs hian pasarihna dinhmun an luah mek bawk a, khawthlang media-te chuan Spurs hian Champions League an khel lo a nih chuan Kane-a chhuah tur thu an sawi.

Khawiah nge?
Paris Saint-Germain chu Kane nena sawizawm langsar ber an ni mek. French club hian Kylian Mbappe an chan a nih chuan a thlak tura Kane lakluh an duh nia sawi a ni a, Mbappe hi Real Madrid nen sawizawm an ni.

Hriat tel atana ṭha chu PSG coach hi Spurs-a Kane nena lo inhrawn tawh Mauricio Pochettino-a ni a, Kane hian France-a kal a hreh lo ang - a man zat erawh pound maktaduai 150 tal ni tura ngaih a ni.

Spurs chairman Daniel Levy hian pound maktaduai 150-a a hralh thei dawn a nih chuan Kane chhuahtir hi a hnial lo nia sawi a ni a, Manchester khaw club pahnih hming pawh an lam ri.

Mahse, City hian pound maktaduai 100 chuang an theh chhuak dawn a nih chuan kum 24 hnuai lam Erling Haaland lakluh an duh zawk a rinawm a, United hian player an hralh ṭhen phawt lo chuan Kane lei tur khawpin pawisa an nei lo bawk ang.