Djokovic-a'n Madrid Open khel dawn lo

Novak Djokovic chuan chawlh hahdam rih a duh a, thla leh maia neih tur Madird Open aṭangin a inhnukdawk. Clay court inelnaah hian a nomawi kawl lai humhim turin a inlan dawn lo tihna a ni.

Nikum khan hri leng vangin Madrid Open hi an khel lo, kuminah chuan Masters 1000 tournament hi French Open inbuatsaihna lian leh hnuhnung a ni ang - player langsar dang chu an inlan ang.

Kum 33 mi Djokovic chuan, "Nomawi ka chawi aṭang khan kum hnih chu a lo ni der tawh mai. Kuminah tel thei lo mah ila nakkum lamah chuan ka inlan theih ngei ka beisei," a ti a, fans lakah hriatthiamna a dil bawk.

Serbian star hian February thla khan Australian Open nomawi a chawi a, major title 18 a lakna chiah a ni. Tun hnaiah erawh beisei ang result a nei thei lo - Monte Carlo Masters leh Serbia Open-ah final a lut phak lo.

Madrid Open hi khel lo mah se Rome leh Belgrade Open chu a khelh a rinawm. Clay court inelna lian ber Roland-Garros chu May 30 aṭangin Paris khawpuiah khelh a ni dawn a, world number 1 Djokovic, Rafael Nadal leh Roger Federer te an inlan ang.