Kelechi-a'n UCL-ah Leicester a hruai thleng thei ang em?

Leicester City-in zanin dar 12:30 hian St. Mary's Stadium-ah Southampton a hmachhawn dawn.

Brendan Rodgers-a hoten match nga khelh tur la awmah season thara Champions League khel turin point kua an la mamawh a, striker goal khung thei Kelechi Iheanacho an kawl bawk avangin an tum ram hi an thleng mai dawn niin a lang.

Foxes hian season liam ta khan hun rei zawk palina china an awm hnuah an match hnuhnung pahnihah Tottenham Hotspur leh Manchester United an hneh lo a, Champions League an khel ta lo.

Season liam taa thil thleng kha uluk zawkin chhui kir ta ila, match 33-na khelh zawhah Foxes hian point 58 hmuin pathumnaah an awm. Panganaa awm Manchester United aia an hmuh tamna erawh point thum chauh a ni.

Tun season-ah Leicester City hi pathumnaah tho awm mah se point 62 an hmu a, pangana West Ham nen an inthlauhna hi point sarih a nih bawk avangin an dinhmun a ṭha tawh zawk.

Foxes hian Southampton bakah Newcastle, Manchester United, Chelsea leh Tottenham te an la hmachhawn dawn a, an fixtures thlir chuan an dinhmun hi a la ṭha lo.

Mamawh chhanna Kelechi?
Leicester City fixtures thlirin chesual thei an la ni a, hemi a nih avang hian Brendan Rodgers-a hoten season tawpa pressure nasa tak an neih loh nan Saints leh Newcastle an hneh ngei ngei a ṭul.

Tun season-a Leicester tana Premier League goal khung tam ber chu Jamie Vardy (13) ni mah se tun hnaia goal khung khawl ber erawh Kelechi Iheanacho (10) a ni. Inelna hrang hranga an goal khung dan thlir phei chuan goal 17 khungtu Iheanacho hi club scorer a ni hial.

Nigerian striker Kelechi hian league match hnuhnung pathumah goal a khung vek a, league match hnuhnung pasarih aṭangin goal kua a khung. Tun thlenga Leicester City-in Champions League an beisei theihna chhan hi amah vang hi a ni a, chutihrualin UCL khelh a duh tak tak a nih chuan goal khung hna hi chhunzawm a ṭul ang.