Nat. Junior Footbal final-ah Mizoram

Hero Junior National Football Championships for BC Roy Trophy-ah Mizoram chuan nimin khan inelna thlengtu Meghalaya 1-0 a hnehin final an lut. 

Final hi February 6, Ningani hian JN Stadium, Shillong-ah khelh a ni dawn a, Mizoram hian vawiin tlai dar 1:00-a inkhel tur Punjab leh West Bengal chak zawk an hmachhawn ang.

Mizoram team hi Shillong-a Mizo awmten an ṭawiawm ṭha a, ṭantu an neih ṭhat theih nan Group YMA leh Shillong MSU-in hma an la hial a ni.

Nikum Subroto Cup-ah Meghalaya an champion a, he mi ṭuma team enkawltu Bobby L Nongbet hi tun ṭuma Meghalaya team enkawltu tho niin Shillong Lajong academy coach a ni bawk.

Subroto Cup best goalkeeper Wanteilang Malngiang chu Meghalaya bang rinawm a ni a, best player Sangti Janai pawh midfield aṭanga team khaikhawmtu a ni.

Hetah hian a la tawp lo - Meghalaya squad 20 zinga 16 hi Shillong Lajong Academy players an ni a, I League Second Division khelh an tum. Semi final lut tur pawhin goal khatmah an chhuah lo a, inelna thlengtu an ni a, an khelmuala khel an ni bawk.

Meghalaya hi champion tumin inpuahchah mah se an khingpui Mizoram hi champion lai an ni a, tun ṭumah hian a lungthu kim nan nomawi chawi ngei an tum.

Mizoram leh Meghalaya an inkhel tawk hle a, minute 32-naah inhliam vangin midfielder pawimawh Gratus Lalneihliana lak chhuah a ngaih avangin second half-ah mual neituin inkhel an thunun ta zawk.

Meghalaya defender pawimawh Henryford Nongeng-a'n second half-ah crossbar a tauh per a, mikhual team an hlauthawng.

Amaherawhchu minute 87-naah vei lam aṭanga Lalawmpuia Sailo cross chu K. Lalchhuansanga'n tauh lutin chakna goal a ni zui bawk.

Mizoram manager Hming-thansanga chuan, "Meghalaya hi inelna thlengtu an ni a, min thlen dan leh kan practice hun an duan danah anmahni ṭhatna turin ruahmanna an siam. Team ṭha tak an neih avangin champion ngei pawh an tum a, Pathian vang liau liauin hnehna kan chang," tiin Vanglaini a hrilh.

Hmingsanga chuan, "An coach Bobby-a'n kan khelh dan a zir uluk a, kan training thlengin a rawn en. Kei ni pawh kan fimkhur a, kan theih ang tawkin kan game plan kan thup. A tawpah erawh player-te huaisen leh thawhrim rah kan seng a, coaching staff thawhhona a ṭha bawk," tiin a sawi.

Mizoram team enkawltute hi Vanlalpeka Ralte (coach), F. Lalrozara (asst coach) leh Lalpekhlua Chenkual (physio) te an ni a; manager Hmingthansanga ho hian kum 2013 leh 2019 khan BC Roy Trophy-ah hian an champion tawh a ni.