Old Trafford-ah Manchester United Vs Liverpool

Pathianni zan dar 9:00 hian Manchester United-in Old Trafford-ah an hmelma Liverpool an mikhual dawn. Season liam ta kha chuan Jurgen Klopp-a kaihhruai Reds hi club dang chunga leng an ni a, tun season-ah erawh Champions League chu sawi loh Europa League pawh khel lo thei dinhmunah an ding.

Manchester United tan erawh ṭan chhan tur a tam tawh lo. Kar liam taa Leeds United nen an inhnehtawk avangin pakhatnaa awm Manchester City chu umphak rual an ni tawh lo a, Pep Guardiola hoten zanina Crystal Palace an hneh chuan an hmelma nomawi chawi hun tih khawtlai chu an tih theih tawk a ni.

Chutihrualin Man United leh Liverpool a nih tawh hi chuan league table thlir kher a ṭul lo a, club inhal tak an nih avangin hmelma laka tlawm an duh dawn lo. Kumin January thla khan Anfield-ah goal awm loin an inhnehtawk.

Chak harsat Reds
Liverpool hian Anfield-ah goal awm loin Real Madrid nen an inhnehtawk a, khualmualah 3-1 a an chakloh avangin an tla. Jurgen Klopp-a hote hi Leeds United leh Newcastle United nen 1-1 ve vein an inhnehtawk zui a, table-ah paruknaah an awm mek.

Klopp-a hote hi hliam vangin an buai a, defender chhuanvawr Virgil van Dijk awm loh hnuah inrintawkna an hloh. Season liam taa an elpui Manchester City nen an inkarah hmun zau tak a awm a, nau ena an en hman Manchester United pawh an u en leh ṭan tawh.

Captain Jordan Henderson-a inhliamin an harsatna a belhchhah a, chutihrualin tlarhma lama an chhuanvawr Mohamed Salah, Sadio Mane, Roberto Firmino leh Diogo Jota te bakah mual sir aṭanga an nawrna Trent Alexander-Arnold leh Andy Robertson te an dam ṭha.

Season khat leka Reds heti tak maia an tlahniam hi a mak a, an inhliam vang chu ni bawk mah se season liam taa Premier League nomawi chawipuitu Klopp chu mawhphurtuah a ngaih theih.

United ve thung
Man United erawh AS Roma 6-2 a hneh zo hlim an nia, an phur vanglai a ni. Italian club laka chiang taka an chak avangin second leg ngaihtuah loin Liverpool nen an inkhel turah rilru an sawrbing thei ang.

Roma lakah hian Edinson Cavani-a'n goal hnih a khung a, Uruguayan striker chelh dan kawng an dap mek. Ole Gunnar Solskjaer chuan, "United-a awm zel turin ka duh tih a hria ang. Edinson-a hian goal a khung thei a ni ringawt lo a, goal chance awm theih dan turin a tlan thiam a, midangin chance ṭha an neih phah. Mipui nen phei chuan Old Trafford hi a nuam a ti dawn, kan bula a awm zel ka beisei," tiin a sawi.

Liverpool nen pawh hian Cavani hian hmun pawimawh a chan a rinawm a, Roma laka bench aṭanga lut Mason Greenwood pawh bul ṭan thei turin a inpeih ang. Pathianni zn inkhel hi season dang chu ni se champion hril thei tur inkhel a ni a, amaherawhchu Champions League khel tur zawnna ang chauh a nih tawh avangin boruak a sang a tawk lo.