FC Goa-in Champions League mangṭha

AFC Champions League-a an match hnuhnung berah FC Goa an tlawm a, Indian squad hlanga khel Indian Super League club hian Al-Wahda chu 2-0 in an ngam lo.

UAE club ṭha Al Wahda tan Omar Khribin leh Mohammed Barqesh-te chuan goal khat ve ve an khung a, Goan club-in a chhanletna tur an neih loh avangin an tlawm.

FC Goa tan keeper Dheeraj Singh bawk a langsar a, Manipur keeper hian a dang hnem malh malh hle - group stage-a match nga a khelhah vawi 25 save a nei a, match hnihah a clean sheet thei.

ISL club hian an coach Juan Ferrando hoin ram pawn lam mi an coaching staff leh player-te chu Al-Wahda hmachhawn hmain an ramah an hawtir a, hei hi ram tam takin India aṭanga an ram luhna Covid-19 vanga an khar vang a ni.

Goan club hian assistant coach Clifford Miranda enkawlna hnuaiah an khel a, ram pawn player leh coach awm lo chunga 2-0 a chak loh hi FC Goa tan result chhia a ni lo.

Group E inkhel dangah Persepolis chuan 4-2 in Al-Rayyan an sawp a, he result avang hian Goan club hian table-a pathumna dinhmun luah chungin group stage an mangṭha - Persepolis leh Al-Wahda ten last 16 an lut thung.

Persepolis tan Shahriyar Moghanlou, Ehsan Pahlavan, Hossein Kanaanizadegan leh Issa Alekasir-ten goal khat ṭheuh an khung a, Al-Rayyan tana Yohan Boli-a goal hnih khungin awmzia a nei lo.