Parker-a'n Chelsea lakah point a beisei

Zanin dar 10:00 hian Fulham chuan Premier League khel turin Chelsea an tlawh dawn a, manager Scott Parker chuan Stamford Bridge aṭangin point hlawh chhuah theih ngei a beisei.

Blues hian kar lehah Real Madrid an mikhual zui dawn, hei vang hian Thomas Tuchel-a'n league lamah a player ṭha ṭhenkhat a hahchawlhtir mai thei. German manager-in player ṭha a khek a nih chuan tlak hlau Fulham tan chanchin lawmawm a ni ang.

Parker chuan, "Team ṭha leh khel tluang tak kan hmachhawn dawn. A nihna takah chuan Stamford Bridge aṭanga point hlawh chhuah hi beisei ngam a har. Mahse anni hian inelna pawimawh khelh tur dang an la nei a, an rilru a phir dawn avangin beisei kan nei thei.

"Kan chak lo a nih chuan engkim a harsa tawh dawn, tun ṭumah hian vanneihna chu kan lamah a ṭan hram ka beisei,"a ti. Fulham hi table-ah 18-na an ni a, an chunga awm Brighton an phak lohna chu point ruk a ni.