Ten Hag-a'n Spurs aiah Ajax-a thlang

Tottenham Hotspur nena sawizawm hlawh mek, Ajax coach Erik ten Hag-a'n London lam pana puanthuah tel tumna a nei lo a, Dutch club-ah kum 2023 thleng cham turin contract thar a ziak.

Kum 51 mi coach hi Ningani khan Spurs-in inbiakna neihpui an tum thu tarlan a ni a, mahse, inbiakna tak pawh an neih hmain a club enkawl laia cham a thlang leh ta zawk.

Dutch coach hian December 2017 aṭang khan Ajax enkawl hna hi a thawk ṭan a, an ram league sang ber Eredivisie-ah 2018-19 season khan a champion pui a, Dutch Cup (2) leh Johan Cruyff Shield (1) a chawi tawh bawk.

Tun season Eredivisie-ah pawh Ajax hi champion thei dinhmunah an ding mek a, Pathianni zan dar 6:00-a FC Emmen an hneh chuan league match thum khelh tur la awm chungin an champion ang.

Kum 2019 khan Champions League semifinal-ah Ajax hi a hruai thleng bawk a, final luh inchuha an inkhelah tuna a hnar tak Tottenham Hotspur hi an ngam lo thung - first leg-ah 1-0 in ngam mah se second leg-ah 3-2 in an tlawm a, away goal rule hmangin an tla.

Premier League table-a pasarihna ni mek Spurs hi coach an zawnna kawngah an tluang rih lo hle. RB Leipzig coach Julian Nagelsmann hming pawh ri ring hman viau mah se Bayern Munich lamah a kal dawn.

Leicester City boss Brendan Rodgers chu Spurs mit latu zinga mi a ni a, mahse, Liverpool boss hlui pawh hian Foxes aia Spurs ngaihsan bik viauna tur a hre lo a, King Power Stadium-a cham a thlang.

Tun dinhmuna Spurs nena sawizawm zinga thuthar nei lo ber chu Ralf Rangnick-a ni. Kum 62 mi manager hian kum 2011 khan Champions League semifinal-ah Schalke 04 a lo hruai thleng taw.

Red Bull GmbH-in infiamna khawvela an luhchilhna kawngah mi ṭangkai niin head of sport and development hna a chelh reng tawh bawk a, Leipzig, Red Bull Salzburg leh New York Red Bulls-ten football khawvela hming an chher nan a thawhhlawk hle.

Chelsea-in Frank Lampard an ban khan coach ni tura biak a ni a, mahse, London club hian season tawp thleng bak contract an zawrh theih loh avangin a lo hnar tawh.

Jose Mourinho bantu Spurs erawhin kum tam zawk contract an zawrh duh ang tih a rinawm a, 'inrinsiak' hun lai a la ni rih - Spurs hi tunah chuan coach lailawk Ryan Mason-a'n a enkawl mek a, Pathianni zan dar 11:45-ah league match khel turin Sheffield United an mikhual ang.