Roma sawptu Man United-in final an hnaih
Europa League semifinal ngaihven hlawh takah Manchester United chuan an mikhual AS Roma chu 6-2 in an sawp. Old Trafford-ah chiang taka an chak avangin Ole Gunnar Solskjaer-a kaihhruaina hnuaiah Man United-in a vawi khat nan final an luh ve ngei a rinawm ta hle.
Ningani zan inkhelah hian Man United tan Bruno Fernandes leh Edinson Cavani ten goal hnih ve ve an khung a, Paul Pogba leh Mason Greenwood ten goal khat ve ve an khung bawk. Roma tana Lorenzo Pellegrini leh Edin Dzeko te goal khungin Italian club beiseina siam bawk mah se a tawpah erawh mualphona hliah khuhtu chauh a ni ta zawk.
Second leg hi May 6, Ningani zan hian Stadio Olimpico, Rome-ah khelh a ni leh dawn a, Roma hian hnehna chang tura goal li tal an khung a ngaih dawn avangin hmabak a hautak dawn hle.
Boruak a ṭang
Man United manager Ole Gunnar Solskjaer-a'n quarterfinal-a Granada an hneh zawhah, "An khel ka la hmu lo a, tute nge an nih ka hre lo," tiin semifinal-a khingpui tur Roma chungchang a sawi.
Norwegian manager hian Roma hi a hre lo tihna ni loin an inkhel a la zirchian loh thu a sawina a ni a, amaherawhchu Roma ṭantu lamin Man United boss thusawi hi an dawngsawng fuh lo. Roma ṭantute chuan poster siamin Solskjaer-a thlalak leh a thusawi hi a dah tel a, "Tute nge kan nih a hre ngei tur a ni," tih an ziak tel bawk.
Poster siamah hian an la duhtawk lo. Roma ṭantute hian England pan tur an player-te thlah turin Covid-19 boruak karah mi 100 chuang an pung khawm a, an player-te hi an fuih phur hle.
A tak ram chu
AS Roma-in tun hmaa an mualpho tawhna Old Trafford an tlawh a, buaina belhchhah turin ṭan aṭanga minute ngana lekah midfielder Jordan Veretout chu inhliam vangin thlak a ngai nghal.
Man United erawh a dam kim a, tlarhmaah sa huai serin an player neih ṭhat Fernandes, Cavani, Pogba leh Marcus Rashford ten bul an ṭan vek. Minute kuana lekah goal mawi bik a lut a, Portuguese midfielder Fernandes-a'n class takin a khung.
Roma lam an vannei a, Pogba handball zarah Pellegrini penalty hmangin an sut. Amaherawhchu keeper Pau Lopez-a'n ṭha zeta Pogba ball pet a dan hnuah a inhliam a, second keeper Antonio Mirante a rawn lut.
Italian club-in ngam lo hret mah se Man City forward hlui Edin Dzeko hmangin hma an hruai a, halftime-ah 2-1 a nih avangin Roma-in beiseina an nei sang hle.
Mahse, halftime-ah Solskjaer-a'n a naute a fuih ṭha a, second half-ah team dang daih an ni. Minute 48-naah Cavani-a'n si phurh rawn sutna goal rawn khung, a khat mawi tawkin goal a lut zui. Uruguayan forward Cavani, Fernandes, Pogba leh Greenwood ten goal khat ṭheuh an khung belh a, Man United-in 6-2 in hnehna an chang.
A la zo lo
Manchester United an chak chian avangin an ke khing khatin final an rap tawhah an ngaih theih a, Solskjaer-a ngaihdan erawh a dang. Norwegian manager chuan, "Hna ṭha tak kan thawk a, mahse kan la zo lo. Second half-ah kan khel ṭha em em a, first-ah erawh kan khel ṭha tawk lo. Kan goal hnih chhuah kha naupang tih aw tawk lek a ni," tiin a sawi.
Team chungchang sawiin Solskjaer chuan, "Kan squad a chhah a, a khel tur thlan awlsam viauin lang mah se a khel lo tur thlan hi a harsa ṭhin. Roma laka bul ṭantute khan Tottenham hmaah an khel ṭha em em a, Mason Greenwood tan pawh substitute-a awm chu pawm thiam a har ang, mahse team ṭhat dan ber kan ngaihtuah tel a ngai a ni," tiin player thlan a har thu a sawi.
Roma manager Paulo Fonseca chuan, "Kan rilru a huaisen tawk lo. Chutihrualin first half-ah substitution pathum inhliam vangin kan hmang zo a, second half-ah tih ngaihna a awm tawh lo. Amadou Diawara leh Chris Smalling te khan harsatna an nei a, ka thlak thei tawh si lo," tiin a insawifiah.
