Jerez tlan kawngah Marquez a kir dawn

Pathianni tlai dar 5:30 hian Circuito de Jerez-ah Spanish MotoGP an tlan dawn, world champion vawi ruk ni tawh Marc Marquez chu nikuma a chetsualna hmunah hian a kir leh thei tawh dawn.

Nikum khan Jerez-ah Marquez a chesual a, a ban ruh vawi thum ngawt zai a ngaih phah hial - a tan season a tawp zui nghal bawk. A hliam vang hian kuminah pawh intlansiak hmasa pahnihah chuan a la inlan thei lo.

Portuguese GP-ah Marquez hi a lo kir a, duhthusam ni nghal lo mah se pasarihna dinhmun a luah. An rama intlansiak tur an nih avangin Spanish rider hi a phur dawn a, chutih rualin MotoGP a luhchilh china hliam na ber a tawrhna hmun a nih avangin a boruak a danglam dawn.

Repsol Hondo rider Marquez chuan, "Jerez-ah hian thawnthu lungchhiat thlak chu ka nei ngei mai, mahse tun hma pawhin chanchin lawmawm ka lo neih fo tawhna hmun a ni ve tho a, zam nachhan tur a awm lo ang.

"Kei chuan a tam thei ang ber bike khalh hi ka duh dan a ni a, ka taksa dinhmun ngaichang chung zelin inelna ka hmachhawn ang. Hnehna chan leh podium lawn chu ka thil tum ber a la ni lo, ṭha taka bike khalh chu ka tum hmasak zawk a ni," a ti.

Season hmasa khan Marquez awm loh karah rider dang an inel tawk hle, a tawpah Suzuki bike khalhtu Johan Mir a vannei ber. Season kal laiah Yamaha bike khalhtu Fabio Quartararo-a'n vawi hnih hnehna chang tawhin championship-ah hma a hruai mek.

France tlangval Quartararo chuan, "Nikum khan Jerez-ah hian hnehna ka chang, kuminah pawh result ṭha ka neih leh theih ka beisei. A hmuna entu an awm loh avangin a ram neitu tan pawh dinhmun a ṭha thei bik lo, chuvangin ang khat vek kan ni," a ti.