Arsenal beiseina siamtu Saka leh Pepe
Beiseina mei mit ṭep tawh chu tlema chhem nun leh a ni. Arsenal chu Europa League semifinal aṭangin an tla ngei dawn niin a lang hman, mahse rawlthar Bukayo Saka-a penalty hlawh chhuah chu Nicolas Pepe-a'n khungin beiseina an la nei chhunzawm.
Ningani zan inkhelah Gunners lamin goal hnih an chhuah hmasa a, midfielder Dani Ceballos hnawhchhuah a ni bawk. Minute 90 an khelh hnuah Villarreal chu 2-1 in an hneh lo a, hun a tawp meuh chuan Spanish team pawh player 10 an ni.
Emery a chak
Unai Emery-a'n a club hlui ṭhat tawk lohna lai a hre chiang, tlarhnung sirah Calum Chambers leh Granit Xhaka te dah an ni a, a sir lam aṭangin Villarreal hian na takin an nawr - Manu Trigueros leh Raul Albiol te hmanga goal khungin an dinhmun a ṭha hman hle.
Chawlhlawk hnu lawkah Gunners midfielder Ceballos chu Daniel Parejo laka a chet dan mawi lo vangin hnawh chhuah a ni, hun tawp lam darkar chanve chhung tlem zawk ni chunga khelh a ngai dawn a, si hnih an phurh bawk avangin beisei a tlem.
Mahse, Arsenal si ban nghaktu Bernd Leno a chesual duh tawh bik lo, mikhual team-in goal khung an harsat laiin Saka chuan penalty a hlawh chhuak hlauh a, winger Pepe-a'n a khung. English rawlthar Saka vang hian hun tawp dawnah Etienne Capoue chu hnawhchhuah a ni bawk.
Beiseina chu
May 6, Ningani zan hian Emirates Stadium-ah second leg khelh a ni dawn a, manager Mikel Arteta naute tan tlang turin 1-0 a chak a tawk dawn. Mahse goal an chhuah palh hlauh a nih chuan thawh chhuah a harsa tawh ang.
Villarreal mualah hian Alexandre Lacazette an chhawr thei lo a, captain Pierre-Emerick Aubameyang chu hun tawp hma minute nga chauh a inlan. Player pawimawh pahnih hi second leg-ah chuan an inlan thei tawh ang, beiseina an neih san phah dawn.
Arsenal manager Arteta chuan, "Bukayo Saka hian season ṭha tak a hmang, ani thlawp thei tur hi midang kan mamawh. Bernd Leno-a'n Gerard Moreno khung tur a dang kha kan vannei. Kan muala inkhel tur kan ni a, chak theihna kawng a la inhawng," a ti.
A fimkhur
Sevilla a enkawl laiin Emery-a'n Europe League nomawi vawi thum a chawi tawh. Arsenal a enkawl ṭum pawhin final a lut a, mahse Chelsea an ngam lo. Kuminah Villarreal chu beiseina sang tak a siamsak mek a, title la turin hmabak a thui tawh lo.
Spanish manager Emery chuan, "Arsenal khan an ṭhat dan berin an la khel lo tih hriat a ngai. Inkhel chanve chauh kan la zo a, a zahve dang kan la hmabak, kan khingpui ten theihtawp chhuaha min beih tawh dawn avangin fimkhur a ngai hle ang.
"2-1 in hma kan hruai a, meimahni lam kan inveng thei a nih chuan final kan lut dawn tihna chu a ni mai. Goal ngah zawk ni mah ila a venhim ringawt kan ngaihtuah thei dawn lo, inbuatsaihna hun kan la neih hi a ṭha thei ang bera hman a ngai," a ti.