Barca an tlawm - La Liga a 'hot' tual tual

Barcelona-in La Liga table chung ber luahna remchang nei mah se an hun ṭha neih an bawhpelh a, Granada laka 2-1 a an tlawm avangin table-ah pathumna an nih chhunzawm.

Catalan club tan Lionel Messi chuan goal hmahruai khung mah se Granada-in Darwin Machis leh substitute Jorge Molina hmangin an chhanglet a, rin loh zawkin 2-1 in hnehna an chang. Barca tlawm avangin La Liga nomawi chuh inum boruak a sang lehzual a, a chung berah Atletico Madrid an awm chhunzawm - an san falna erawh point hnih chauh a ni.

Real leh Barca-ten Atletico hi point hnih ve vein an phak lo mek a, palina Sevilla hian point thum chiahin an thlau bawk.

Bul ṭantu Messi
Barcelona-in La Liga champion beisei chungin match an khel a, Granada beisei erawh season thara Europa League khelh phak a ni - minute 23-na lekah team ṭha zawk Barca-in goal an khung hmasa.

Messi leh Antoine Griezmann-ten mawi taka ball an inpek kual hnuah Messi-a'n a hmawr a bawk a, kum 33 mi forward hian a thiam a la theihnghilh lo tih pholangin goal kil sirah a khung. Paris Saint-Germain nena sawizawm mek Messi-a'n tun season La Liga-a goal 26-a khungna chiah a ni a, inelna hrang hrangah match 43 khelin goal 34-a khung a, assist vawi 14-a nei tawh bawk.

Barcelona-in first half-ah inkhel an thunun chhunzawm a, mahse, a pawimawh ber goal an khung belh loh avangin 1-0 in chawlhlawk hman a ni.

A pawi zo ta
Nou Camp-a inkhel an ni a, goal hmaah Barcelona vannei tawk lo mah se point thum nen inkhel an khar mai tura ngaihna a lian hman hle. Mahse, Granada lamin ngaihdan dang an nei thung.

Chawlhlawk hman zawh hnuah Granada an hlauhawm sawt a, tlarhma lama Roberto Soldado, Luis Suarez leh Darwin Machis-te che vel chu Barca tlarhnung tan manganpui tham a ni. Minute 63-naah Granada lam hian an khung ta nge nge a, Machis chuan Nou Camp-ah a team tana beiseina siamsak turin si phurh sutna goal-a rawn khung.

Barca an harh phah lo - hun tawp nan minute 11 chauh a awm tawh tihah Adrian Marin-a ball thlawh luh chu bench aṭanga luhtir Molina chuan a tauh lut a, 2-1 in Granada an chak - Europa League playoff khel phak china awm Villarreal chu match nga khelh tur la awmah point li chiahin an thlau tawh.

Hmabak a thim
Barca-in Granada lakah 82% zet ball an chang a, vawi 16 an shot a, vawi li target zawnah a kal - Messi, Griezmann leh Sergio Roberto-ten an hun ṭha neih an chhawr lo vek a, Barca an vannei tawk lo.

Atletico lehpela hmahruaina hun ṭha tak chu Barca hian an bawhpelh a, an ui vawng vawng ang. Granada tan Machís-a'n si phurh a sutin Barca boss Ronald Koeman a lawm lo fal a, hnawhchhuah a ni. Dutch coach hian mipui ṭhutna aṭangin inkhel a en zui a, a assistant Alfred Schreuder chu phone hmanga be chungin inkhel kaihhruai dan tur a hrilh a, a beisei ang result erawh a hmu lo.

Barcelona hian Pathianni zan dar 12:30-ah Valencia an lenchilh zui dawn a, he inkhelah hian Koeman chuan a naute a kaihruai thei dawn lo - nomawi inchuh boruak san laia thil thleng atan chuan a duhawm lo hle.

Koeman a lawm lo
Hrem a nih avangin Barca boss a lawm thei lo. Koeman chuan, "Referee report-ah chuan fourth official ka zah loh thu a inziak a, mahse, a dik lo.

"Ka tel loa Valencia hmachhawn a ngai tur hian Barca a nghawng dawn em ka hre lo a, kei erawh min nghawng na dawn a ni. Ṭawngkam mawi lo hmang ni ila ka pawm mai ang. Mahse, chutiang chu a ni lo," a ti. Barca hian Valencia an hmachhawn hnuah May 8 zanah Atletico Madrid an mikhual dawn a, La Liga champion tur zawnna kawngah he inkhel hi a pawimawh khawp ang.

Koeman chuan, "Result duhawm lo tak a ni a, Pathianni zan kan inkhel a pawimawh dawn takzet - tumahin game awlsam kan nei tawh lo," a ti.

Hmabak chu
Pathianni zana Barca inlan hmain Atletico Madrid chu zanin dar 7:45-ah an inlan dawn a, Elche an lenchilh ang. Diego Simeone-a nauten an hmabak match-ah Barca an la awm tel tih hriain chak an tum ang.

Pahnihna Real Madrid chu zanin dar 12:30-ah an inlan dawn a, Osasuna an mikhual ang. Champion beisei zingah Real fixture hi a hautak ber ang hiala sawi theih a ni a, May 5 zanah Champions League semifinal second leg khel turin Chelsea an lenchilh zui dawn.

Zinedine Zidane-a'n thiam taka a naute a chhawr a ngai dawn tihna a ni a, Chelsea hi first leg inkhelah 1-1 in an inhnehtawkpui tawh tih hriat a ṭha - Blues zawhah hian champion beisei zinga mi Sevilla chu May 9 zanah an mikhual zui ang.

Sevilla hian Thawhṭanni zan dar 12:30-ah Athletic Bilbao an mikhual dawn. La Liga top four-ah Barca vs Atletico leh Real vs Sevilla kan la hmuh dawn avangin Spanish top flight league hi a la ngaihnawm dawn chauh.