Poch tan thluak hman a ngai

Paris Saint-Germain duh ber chu Champions League nomawi a ni a, hetihrual hian Ligue 1 nomawi an kawl lai hloh ngawt chu thil dik a ni chuang lo. PSG manager Mauricio Pochettino tan inelna pahniha hlawhtling tur chuan thluak hman a ngai dawn hle.

UCL semifinal first leg-ah PSG hian Manchester City 2-1 in an ngam lo, second leg khelh hmabak an la neih avangin final luh beiseina an la nei. French champion hian Man City an tlawh hmain zanin dar 8:30 hian league match khel turin Lens an mikhual hmasa phawt ang.

Ligue 1 match 34 an khelh chinah PSG-in point 72 an hmu a, pahnihna dinhmun an luah - hmahruaitu Lille an phak lohna chu point khat a ni. Khelh hmabak match li chiah an nei tawh a, Paris club tan chetsual a thiang lo, an chung ami chetsual an chan tel a ngai bawk.

PSG manager Poch chuan, "Hun harsa leh khirhkhan hi chu ka lo hmachawn ve fo tawh. Tun ṭumah pawh hian a awlsam dawn lo, amaherawhchu kan squad a chhah ṭha ve tawk a, chuvangin kan hmabak hi kan paltlang theih ka beisei," a ti.

Argentine manager hian Neymar, Kylian Mbappe leh Ange di Maria te chu chawlh hahdamna hun a pe mai thei. Anni pathum tel lo pawhin Mauro Icardi leh Moise Kean te an la neih avangin tlarhma lamah buaina a awm lo ang.