Inter President a phur tawh

Thla sarih zet a liam hnuah Inter Milan president Steven Zhang chuan a hmunah ngei Italian club a tlawh ve leh ta, nipui bazar atan a phur hle tawh niin a lang - manager Antonio Conte tan chanchin lawmawm a ni ang.

Season hmasa khan Inter hi Serie A-ah pahnihna an ni. Inter manager Conte-a'n club neitu aṭanga thlawpna a hmuh ṭhat tawk loh thu a sawi hial, kuminah erawh an chesual viau a nih ngawt loh chuan Juventus hnen aṭangin nomawi an chawi dawn.

Khawthlang media-te tarlan dan chuan Nerazzurri hian player langsar lakluh an tum dawn a, an neihsa zinga mi chu hralh tum an nei lem lo. Italian manager Conte-a'n season tharah chuan league bakah Champions League thlenga hlawhtlin a tum dawn niin a lang.

Inter hian zanin dar 9:30 hian Crotone an hmachhawn dawn. May 8, Inrinni zanah Sampdoria an mikhual bawk a, an match khelh hmabak pahnihah hian an chak a nih chuan match thum khelh tur nei chungin an champion phak tawh dawn.