League Cup semifinal King Power Stadium-ah Villa leng dawn

Carabao Cup inelna, League Cup tia hriat lar zawk semifinal pahnihna chu zaninah khelh a ni dawn a, dar 1:30 hian Leicester City chuan Aston Villa an mikhual dawn. 

Foxes hian 2015-16 season khan khawvel barakhaihin Premier League nomawi an chawi a, hemi hnuah erawh nomawi liantham chawi nei leh tawh loin hun an hmang. Aston Villa hian 1995-96 khan League Cup nomawi hi an chawi a, hemi hnuah hian nomawi liantham chawi an nei leh tawh lo. 

Club pahnih tan an nomawi dahna khawhar taka nomawi hun lehna remchang a ni a, a bik takin mahni muala khel tur Foxes tan second leg a la awm avangin chak loh a thiang lo ang. 

A nupuiin fa a hrinsak leh a inhliam bawk avangin Jamie Vardy-a'n Foxes match hnuhnung pathumah a hmel a lan thei lo a, zaninah erawh English striker a lo kir dawn. 

Vardy awm loh hlana an match thumah Foxes hi an chak vek a, kum 32 mi striker telin team ṭha zawk an ni dawn tihna a ni a, Foxes tana chanchin lawmawm hi Villa tan hriat nuam a ni lo. England tan vawi 26 inlana goal sarih khung thei Vardy hian tun season-ah league match 18 khelin goal 17 a khung tling der tawh a, Villa assistant coach John Terry-a'n an tlarhnung lam zirtirna a pek ṭhat a ṭul dawn. 

Premier League lamah pawh Foxes hi hmahruaitu Liverpool hnaih bertu an ni a, James Maddison, Wilfred Ndidi, Ben Chilwell leh Caglar Soyuncu te ho an kawl bawk avangin Villa tan a awlsam dawn lo. 

Match hnuhnung pathumah Aston Villa-in vawi khat chiah hnehna an chang thei a, FA Cup third round-ah pawh Championship club Fulham chu 2-1 a ngam loin an tla. 

Tun hnaia an result thlirin Villa tan tlang 'chance' a tlem tih a lang a, hetihlai hian striker Wesley Moraes leh goalkeeper Tom Heaton te an chhawr theih loh bawk avangin Villa tan Foxes hmachhawn a chakawm loh ang. 

Villa hian quarterfinal-ah Liver-pool hneh mah se an hmachhawn team hi Reds B team pawh ni pha lo ang deuhthawa sawi theih an ni a, inchhuanna tur a awm lo. 

Zaninah Foxes laka an chak chuan second leg a awlsam sawt dawn tih a chiang a, chumi tur chuan goal sarih khung tawh Conor Hourihane leh goal riat khungtu Jack Grealish te chet ṭhat a ṭul ang.