Chelsea damna Kai Havertz

Kai Havertz-a goal hnih hmangin Chelsea chuan Fulham an hneh a, Blues hian Premier League table-ah palina dinhmun an luah nghet - Champions League khel pha chinah an awm ngei dawn niin a lang.

Fulham erawh an chak loh avangin Premier League aṭangin an tla ngei dawn niin a lang ve thung. Scott Parker naute hian match 34 aṭangin point 27 chauh an nei a, a him china awm Newcastle chu point kuain an phak lo, match khatin an khel hnem zui.

Havertz goal hnih
Pound maktaduai 71 man Havertz-a'n manager Thomas Tuchel rinna a tihlawhtling. Inrinni zan Stamford Bridge-a inkhelah, minute 10-na lekah Mason Mount-a'n through ball chu mawi fahranin a la thla tawp a, Havertz-a tana duhthusamin Fulham defender karah ball a thawlh lut, German midfielder hian awlsam takin goal hmahruai a khung.

Germany international hian goal hnihna khung zuiah inngai mah se VAR hmangin an hnawl, mahse dan reng theih a ni lo. Timo Werner nen an in one-two hnuah goal sawisel theih tawh loh a khung a, an mualah point thum an hlawh chhuak.

Fulham lamin thih thain an bei a, Antonee Robinson leh Ola Aina-ten goal khung theihna remchang nei mah se keeper Edouard Mendy an paltlang zo lo; an tan EPL khel zel tur chuan thilmak a thlen a ngai tawh ang.

Blues manager Tuchel chuan, "Tlarhma lamah Kai leh Timo an inkawp fuh a, goal an sual chhuah bakah kan khingpui an chhaih mangang thei hle. England-ah season khat an hmanna chauh a ni a, hmasawnna lai tur erawh a la tam," a ti.

Hmabak chu Real
Tuchel-a enkawl Chelsea hi kar hmasa khan Real Madrid nen 1-1 in an inhnehtawk a, Champions League final lut thei dinhmunah an ding mek. Nilaini zan hian Spanish club lian hi an mikhual zui leh dawn, inkhel hautak a ni ang.

Chelsea hi league lamah an dinhmun a la chiang bik lo a, palina aṭanga tla hniam thei reng an la ni. Tuchel-a'n player siksawi duh mah se inkhel vek theih ngawt a ni lo - Real hmachhawntu aṭanga player pali siksawi chungin mikhual an thleng a, point thum hmuh hi lawmna tur a ni.

Midfielder Mount a hmuhnawm a, an chakna thahrui pawimawh a ni. Tlarhnungah Thiago Silva, Kurt Zouma leh Andreas Christensen te an dingnghet, Reece James leh Ben Chilwell ten goal venhim bakah a nawr kawngah an thawhhlawk bawk.

Tuchel chuan, "Match hautak tak mai khelh tur pahnih kan neih karlakah pawh kan inthlahdah miah lo a, khelmual chhungah 100% rilru kan pe thei kha ka lawm," a ti a, an khingpui Fulham aia chak an phu zawk thu a sawi bawk.

Foxes an chelh
Zirtawpni zan khan player 10 a khel Southampton leh Leicester City te 1-1 in an inhnehtawk. Foxes hian table-ah pathumna dinhmun an sawhnghet thei lo a, nikum ang khan season tawp lama zuih thei dinhmunah an ding.

Minute 10-na lekah Jannick Vestergaard chu Jamie Vardy laka a foul avangin hnawhchhuah a ni a, mikhual Leicester chu chiang taka chak tura ngaih an ni. Mahse, second half-ah Saints hian James Ward-Prowse-a penalty khung hmangin hma an hruai zawk a, Foxes tan Jonny Evans-a'n a sut hram.

Tlarhmaah Brendan Rodgers-a naute an vannei lo, tun hnaia khel ṭha bik Kelechi Iheanacho-a'n goal a khung lo a, a handball vangin penalty a chawi. Hun tawp dawnah striker Vardy-a'n hun ṭha nei mah se goalkeeper Alex McCarthy chuan a lo dansak.

Foxes hi pangana West Ham aiin point riatin an sang zawk, mahse an hmabakah - Newcastle United, Manchester United, Chelsea leh Tottenham an la hmachhawn dawn avangin an dinhmun hi a la him rih chiah bik lo.