Andy Ruiz Jr a lo kir e

December 2019-a Anthony Joshua-a ngam loh hnua a vawi khat nan Andy Ruiz Jr. chu boxing ring chhungah a lo kir leh ta a, Chris Arreola chu unanimous decision (117-110, 118-109 & 118-109) hmangin a hneh.

Kum 40 mi Arreola hian second round-naah Ruiz hi a hnek tlu a, khawvelin a beisei loh result-a hmu dawn niin a lang hman - mahse, Mexican-American boxer Ruiz a tho leh a, a tawpah chuan hnehna chang zawkah a ṭang.

Kum 31 mi Ruiz hian June, 2019 khan khawvel barakhaihin Anthony Joshua chu round sarihnaah a knockout a, WBA (Super), IBF, WBO leh IBO heavyweight title-a chhuhsak.

Mahse, December, 2019-ah Joshua hian unanimous decision hmangin a hneh let a, a title-a la let - Ruiz hian hetihlai hian a thil ei luat leh party nasat chu a chak loh chhanah a puh a, a thau hle.

Khawvela trainer ṭha ber pawl Eddy Reynoso-a hnuaiah a intuaihriam zui a, Joshua nena an inhnek aṭanga chhutin Arreola-a hmachhawn dawn hian kg 24 zet a hloh hman!

Dignity Health Sports Park, Carson, California-a hnehna changtu Ruiz chuan, "Hnehna chang tura kan tih tur chu kan ti a ni," tiin a sawi zui.

Ruiz hian inhnek vawi 36-a hmachhawnah vawi 34 hnehna a chang a, vawi hnih a tlawm - a hneh tak Arreola hian vawi 48 fight hmachhawnin vawi 38-a chak a, vawi sarih a tlawmna a ni thung. Vawi khat draw result a nei a, vawi hnih chu damdawi hman phal loh a lo hman avangin 'no contest'-ah puan a ni bawk.