Osaka a chak nuamsa

Naomi Osaka chuan tun season bika clay court tournament a khelh hmasak berah hnehna a chang. Japanese star hian Misaki Doi chu 7-5, 6-2 in a hneh a, a match lehpekah chuan Karolina Muchova a hmachhawn leh ang.

Kum 23 mi Osaka hian inkhel tir lamah a service a hloh, mahse insiamṭha nghalin a chesual nawn lo - darkar khat leh minute 27 an inkhelh hnuah harsa vak loin a chak, aces vawi ruk a siam zinga pakhat chu match point a hmuh hnu, chakna point atana a vuak chhuah a ni.

Australian Open leh US Open champion tawh hian clay court-ah hlawhtlinna a la chang ngai lo, kumin hian clay bakah grass court lamah hlawhtlin a tum a, tuna inelna a hmachhawn pawh French Open inbuatsaihna a ni nghal.

World number 2 Osaka chuan, "Hard court lama ka khelh angin nuamti taka khelh kha ka thil tum ber a ni a, tun ṭumah chuan ka thil tum ka ti hlawhtlingah ka ngai," tiin harsatna a tawh loh thu a sawi.

Inkhel dangah Venus Williams a chak lo. Venus hian break point vawi 13 a hmuh zinga pathum chiah a chhawr ṭangkai thei a, amah ang bawka Amercian player Jennifer Brady lakah 6-2, 6-4 in a chak lo.