Maradona-a'n enkawlna a dawng ṭha tawk lo

Medical lama mi thiamten Diego Maradona thih hmaa an enkawl dan an zirchiang a, football legend hian enkawlna a dawng ṭha tawk lo tih chu an thutlukna a ni.

A thih dan
Football legend Diego Armando Maradona hi nikum November 25, Nilaini khan Buenos Aires-a a chenna inah lungphu chawl vangin a thi. November 3, 2020 khan Maradona hi a thluaka thi tling a awm avangin zai a ni a, amah enkawltu doctor chuan hlawhtling taka an zai bakah enkawlna ṭha tak a dawn thu a sawi.

November 1, 2020-ah a chenna ina inenkawl chhunzawm turin damdawi in hi a chhuahsan a, zu a nghei theih nan enkawl tel a ni bawk. Maradona hian November 25, 2020-ah ṭum dang aiin chhun chaw a ei hma a, a nawm sam loh avangin mut hahchawlh a duh thu amah enkawltu nurse a hrilh.

Argentina-a chanchinthar lakhawmtute ziah danin nurse hian Maradona dinhmun ṭha lo hi a hmu hmasa ber a, ambulance pakua zet tirh nghal ni mah se an chhan hman ta lo. Damdawi in a chhuahsan aṭ­anga kar hnihnaah Diego Maradona a thi.

Zirchianna chu
Maradona thih aṭanga ni rei pawh a liam hmain Argentine dan kengkawhtute chuan football legend thihnaa doctor leh nurse te hi a chhui chiang nghal. Kumin March aṭang khan medical lama mi thiam bik mi 20 awmna panel an siam a, Maradona thihnaah hian dawngdahna a awm em, tih an zirchiang.

Panel zirchianna hi phek 70 zeta chhah a ni a, Maradona hi a thih hma darkar 12-ah a khua a sik nasa tih hriat a ni. Hemi hun chhung hian ngaihsak a hlawh tawk lo tih a inziak.

Panel-te chuan Maradona enkawltu medical team-te hi an thiamnaa innghat loin an 'rinnaah' an innghat mah mah an ti a, hei bakah hian in lamah in enkawl loin damdawi inah enkawl ni se dam chhuahna kawng a inhawng zau zawk ang, an ti.

Reuters chuan, "Maradona an enkawlna dan hi a beitham a, a ṭha tawk lo a, an fimkhur tawk lo," tiin panel ho thutlukna an ziak a, Argentine legend ngaisangtute rilru a na thar leh ang.

Panel zirchian zingah hian Maradona mimal doctor Leopoldo Luque leh psychiatrist te pawh an tel. Dan anga an zirchian lehchhan hi Maradona fanuten thuneitute hnenah sawiselna an thehluh vanga a ni a, Maradona an enkawl danah an lungawi loh vang a ni.

Hetihlai hian Dr Lugue hi thiam loh chantir a ni lo a, tihsual a neih loh thu a sawi thung. Nikum November thla khan Dr Lugue chuan, "Eng nge mawhphurhna ka neih? Ka hmangaih vang hi a mi, nge uluk taka ka enkawl vang, nge a nunna ka pawhsei vang zawk, a hun tawp lama nun nuam zawk ka neih tir hi a mi?" tiin mittui tla chungin thiam lohna a neih loh thu a sawi a, Maradona chhan turin a theihna zawng zawng a chhuah thu a sawi.