DFB Pokal final-ah Dortmund vs Leipzig

German Cup semfinal chu tunkar tawp khan khelh a ni a, Zirtawpni zan khan RB Leipzig chuan Werder Bremen 2-1 a hnehin final an lut. Inrinni zanah Borussia Dortmund-in Holstein Kiel 5-0 in an sawp ve bawk.

DFB Pokal final hi May 13, Ningani zan dar 12:15 hian Olympiastadion Berlin-ah khelh a ni dawn. Leipzig manager Julian Nagelsmann-a'n season tharah Bayern Munich a enkawl tawh dawn a, Dortmund manager lailawk Edin Terzic-a'n a hna a chelh chhunzawm dawn loh bawk avangin manager pahnih tan final pawimawh bik a ni ang.

Leipzig an vannei
Weser Stadium-ah mikhual Leipzig-in chance an nei hmasa a, Alexander Sorloth-a ball tauh chu Bremen keeper Jiri Pavlenka-a'n a dang ṭha takzet. Bremen tan Josh Sargent-a'n chance ṭha a nei ve bawk a, keeper chiah a hmachhawn hnuah goal zawnah a kal lo.

First half-ah goal a lut lo a, second half-ah pawh goal hmuh tur a awm lo. Leipzig defender Will Obran-a ball tauh-in crossbar a per a, a goal teuh hle. Hun pangngaiah goal a luh loh avangin extra time khelh a ni a, substitute Hwang Hee-chan chu Leipzig 'hero' a ni.

South Korean striker Hee-chan hi extra time-ah lutin minute 93-naah Leipzig tan a khung. Amaherawhchu Dayot Upamecano tihsual vangin Leonardo Bittencourt-a'n extra time first half injury time-ah a sut.

Penalty pet ngei a ngai tawh dawna a lan hnuah Hwang Hee-chan tauh let chu Emil Forsberg-a'n injury time-ah a pet goal a, Werder Bremen tan siphurh sutna hun a awm tawh lo. Extra time-ah Leipzig 2-1 in an chak.

Dortmund chak awlsam
2. Bundesliga club Holstein Kiel-in semifinal an thleng satliah lo a, champion lai Bayern Munich thlengin an hneh. Thilmak thlen beiseiin Holstein Kiel hian Signal Iduna Park an tlawh a, amaherawhchu Borussia Dortmund hneh tur chuan an la ṭha tawk lo.

Dortmund tan Giovanni Reyna-a'n goal hnih a khung bakah Marco Reus, Thorgan Hazard leh Jude Bellingham ten goal khat ṭheuh an khung a, 5-0 in hnehna an chang.

Dortmund tana chanchin duhawm loh erawh substitute Mateu Morey chuan a luh aṭanga minute 12-na lekah a khupah na takin hliam a tuar a, hun rei tak a chawlh a ṭul ang.