Serie A champion Inter Milan?

Inter Milan chu Serie A champion thei dinhmunah an ding ta, nizan inkhelah Atalanta an chak lo a nih chuan, he thu i chhiar meuh chuan Antonio Conte naute chu Italian champion an ni chiang der tawh ang.

Inrinni zan inkhelah Inter hian Christian Eriksen leh Achraf Hakimi te goal hmangin Crotone chu 2-0 in an hneh a, match 34 ve ve khelh tawh chinah anmahni hnaih bertu AC Milan aiin point 13-in an sang fal zawk.

Nizan khan pathumna dinhmuna awm Atalanta an inlan, an chak a nih chuan Inter champion tur hi an la chelh khawtlai hret ang. Atalanta hian chelh rih pawh ni se Inter tan match khat chak bak a ngai tawh dawn lo.

Serie A-ah Juventus an chungnung ṭhin, tun hnai season kua ngawt an champion thei. Kuminah erawh Old Lady rorelna a tawp a, kum 2010 hnuah a vawi khat nan Nerazzurri tan nomawi a hmin ve leh dawn ta.

Inter manager Conte chuan, "Ka nauten nasa takin hma an sawn, position tin maiah hma kan sawn avangin ka lawm. Hmathlir thui tak kan nei a, chumi ti hlawhtling thei tura kan rilru put hmang a dik pawh hian min ti lawm.

"Match hnuhnung zawka Verona kan hneh hnu khan ka naute chu hahchawlh turin ka ti, taksa leh rilru hahdam taka an awm hnuah ṭha taka an rawn khel chhuak leh thei nghal hi a lawmawm," a ti a, Italian manager hian a naute thawhrimna a fak bawk.

Inter-in hnehna an chan vanga nomawi an khawih phak rual hian, a chak lo zawk Crotone erawh Serie A aṭangin an tla thung - match 34 aṭangin point 18 chauh an hmu a ni.