PSG leh Lille an inum zel

French Ligue 1 nomawi inchuh chuan a vawr tawp a thleng chho mek a, champion lai Paris St-Germain chuan Lens hneha hma an hruai hnu lawkah Lille-in point thum an hmu ve leh a, table chung berah Lille an awm.

Inrinni zan inkhelah PSG hian Neymar leh Marquinhos te goal hmangin Lens 2-1 in an hneh. Parc des Princes-ah PSG an chak a, match 35 aṭanga point 75 hmuin table hmahruaitu pawh an ni lailawk hman.

Paris club an chak tih hre sain Lille an inlan a, an buai phah lo. Lille hian Nice 2-0 in an hneh a, an elpui PSG aiin point khatin an sang leh hret - league match vawi thum chauh khelh hmabak a awm tawh.

Mauricio Pochettino-a enkawl PSG hian Thawh-lehni zanah Champions League semifinal second leg khel turin Manchester City an tlawh zui dawn a, league lama hnehna an chan avangin inrintawkna an neih belh ang.

Poch-a'n Man City lakah team ṭha chhawp chhuah a ngai tih a hria. Angel di Maria leh Marco Verratti te hahchawlhna hun a pe a, forward ṭha mi Kylian Mbappe chu hliam tenau vangin a chawlhtir bawk.

PSG manager Pochet-tino chuan, "Lens kha team ṭha tak an ni, mahni inven an thiam bakah min nawr na thei hle. Paris khawpuiah hian thla li chauh hun ka la hmang a, hetih chhung hian thil tam tak ka tawng tawh, team ṭha awm tam mah se keini hi a ṭha ber chu kan ni.

"Player ṭhenkhat an chawlh a ngaih chang a awm, chung hunah pawh chuan ṭha taka khel thei midang an awm avangin a lawmawm. Season a la zo lo a, hun pawimawh ber laia ngaih kan hmachhawn mek a ni," a ti.