Tottenham an hmanhmawh lo

Tottenham Hotspur chu manager ban tak Jose Mourinho thlakna tur chungchangah an hmanhmawh lo. London club hian April 19 khan Portuguese manager Mourinho hi an ban a, hemi hnu hian RB Leipzig coach Julian Nagelsmann, Ajax coach Erik ten Hag leh Leicester City coach Brendan Rodgers-te nen sawizawm mah se an chang lo vek.

German manager Nagelsmann hian Bayern Munich a zawm dawn a, Erik ten Hag-a'n Dutch club-ah a contract a pawtsei a, Rodgers-a'n Spurs zawm aiin Foxes-a awm zel a duh zawk. Spurs-in manager thar lak kawngah harsatna an tawk a, chairman Daniel Levy-a'n manager ṭha zawn nan hun a duh tur thu a sawi.

Tottenham hi Ryan Mason-a'n a enkawl lailawk a, kum 29 mi Mason hian season khelh hmabakah a enkawl ang. Spurs hian season tharah Europe inelna liana tel an la inbeisei a, nizan khan table mawngphaha awm Sheffield United an hmachhawn.

Kum 58 mi Jose Mourinho pawhin football team a enkawl leh hmain hahchawlh phawt a tum. Mourinho chuan, "Tum dan ka la nei rih lo. Nun phung pangngai neih ka duh a, hahdam taka chawlh hman ka duh. In lamah kan khelh dan ka thlir let ang a, kan chet ṭhatna leh ṭhat lohna hriatchhuah ka tum dawn," tiin a sawi.

Mourinho hian thla 17 chhung Spurs a enkawl a, season chawhnu lamah a che ṭha lo. Portuguese manager hian Chelsea, Manchester United, Inter Milan, Real Madrid leh Porto a enkawl tawh a, kumin hi season khat chhunga league match 10 a chak loh tlin hmasak ber a ni.