Madrid khaw club an chak - champion tum an inum zel

Inrinni zan La Liga inkhelah Atletico Madrid leh Real Madrid an inlan a, team pahnihin hnehna an chang ve ve - an inkarah point hnih a awm.

Atletico Madrid hian khualmualah tlak hlau Elche chu 1-0 in an luhchhuah a, Diego Simeone-a team tan Marcos Llorente chuan goal awmchhun a khung. Atletico chak thu hre sain Real Madrid an inlan ve leh a, an mikhual Osasuna chu 2-0 in an hneh. Mikhual team tan Eder Militao leh Casemiro-ten goal khat ve ve an khung a, Osasuna-in a chhanletna tur an nei lo.

Nizan khan Barcelona-in Valencia an lenchilh a, he thu buatsaih a nih lai hian result kan hre hman lo. Zanin dar 12:30-ah palina Sevilla chuan Athletic Bilbao an mikhual bawk ang.

Atletico tan thawhlehna?
January thla tawp thleng kha chuan La Liga-ah Atletico an vawk lal len a, Diego Simeone-a naute hi kum 2014 hnua a vawi khat nan league-ah an champion leh mai dawn niin a lang hman.

Mahse, football a ni miau a, thilmak a thleng. February hnua league match 14 an khelhah Atletico hi vawi ruk chiah an chak a, vawi thum an tlawm a, vawi nga an khingpui an inhnehtawkpui. Elche an lenchilh hmaa an match hnuhnung berah pawh Atletico hi an tlawm a, khualmualah Athletic Bilbao chu 2-1 in an ngam lo - La Liga nomawi inchuhna kawng an hawng zau sawt.

Hei vang hian Elche lakah pawh Atletico fans tan beisei a sang lo a, Elche hi team lian ni lo mah se La Liga-a inhamtan tum an nih avangin an tawh a khirh dawn tih a chiang.

Champion zia?
Atletico-in inkhel ṭantir aṭangin an nawr nghal a, Luis Suarez chuan goal hmahruai a khungah inngai mah se video assistant referee rawn a nih hnuah pawmsak a ni lo thung.

Minute 23-naah erawh Atletico an vanduai nawn tawh lo - Yannick Carrasco siamsak chu Llorente chuan rang takin a khung nghal a, Elche keeper Paulo Gazzaniga tan tih theih a awm lo.

Atletico an vannei. Hun pek belhah Llorente handball vangin penalty an chawi a, mahse, Elche tana Fidel Chaves-a penalty pet chuan post bak a per thei lo - a tawpah Atletico an chak a, khel ṭha lo chunga chak hi 'champion zia' tia an sawi ṭhin kha a ni.

Hetihrual hian Atletico hian an vanduaina zawn an thlir duh a nih chuan sawi tur an nei ve tho - Suarez-a goal khung pahnih chu pawmsak a ni lo a, Diego Gonzalez handball vanga an penalty hmuh chu VAR-in a thaichhiatsak bawk.

Real an hlauthawng
Atletico Madrid chak thu hre sain Real Madrid an inlan a, an chak loh chuan La Liga nomawi a hla tawh dawn tih an hai lo - inkhel ṭantir aṭangin an nawr nghal a, an beisei goal erawh an hmu lawk lo.

January hnua a vawi khat nana bul ṭan Eden Hazard-a'n chance duhawm nei nghal mah se Osasuna goalkeeper Sergio Herrera chuan a kut hmawrin a lo dansak a, save ṭha bik a ni. Spanish keeper Herrera hian Militao ball tauh ṭha zet chu a dang bawk a, first half-ah Osasuna tan 'a changtupa' a ni - Real an che hleithei lo.

Mikhual team Osasuna tan Argentine forward Chimy Avila chuan chawlhlawk hmain goal-a khungah a inngai a, mahse, offside vangin pawmsak a ni lo thung.

A tawpah a changtupa
First half-ah Spanish keeper Herrera-a'n a changtupa dinhmun a luah a, second half-ah erawh champion duh Real team chu 'a changtupate' an ni ta zawk.

Goal khung tur erawhin an nghah rei a la ngai cheu - Militao chuan minute 76-naah a tauh lut a, second half-a target zawna Real-in 'attempt' an neih hmasak ber a ni. Minute li a liam a, Real bawkin goal an khung. Karim Benzema siamsak chu Casemiro-a'n an goal hnihna ni turin a khung a, hun tawp thlenga goal dang lut loin Real an chak.

Real tan centre back Raphael Varane chu minute 45-naah hliam vanga lakchhuah a ngai a, Real boss Zinedine Zidane chuan a defender hi Chelsea hmachhawn tura a dam hman a beisei thu a sawi.

Hmabak chu
Real hian Nilaini zanah Champions League semifinal second leg khel turin Chelsea an lenchilh zui dawn -first leg-ah 1-1 in an inhnehtawk tawh.

Zidane chuan, "Varane-a hliam kha na tak a nih loh ka beisei a, ani pawhin chu chu a hmuh dan a ni," a ti a, hliam vanga chawl mek captain Sergio Ramos chu Blues laka lo kir tura a beisei thu a sawi bawk. Champion beisei zinga mi Sevilla chuan zanin dar 12:30-ah Athletic Bilbao an mikhual dawn a, Sevilla hian match khata khel tlem chungin point ruk chauhin Atletico an phak lo - May 9 zanah Real an lenchilh zui ang.

Hmahruaitu Atletico hian May 8-ah match an nei lehnghal dawn a, an hmachhawn tur hi nizana inlan Barcelona a nih avangin boruak a 'hot' dawn.