Tokyo Olympic a chiang, mahse a chiang lo!

Infiamna khawmpui lian leh ropui Tokyo Olympic 2020 chu a hun a thleng hnai a, neih ngei a ni dawn niin a lang ta - mahse Japan khawpuia inelna lian neih tur hi hri leng vangin a dinhmun a chiang fak thei lo.

Hripui leng vangin 'Engmah a chiang lo' tih bak hi thil chiang a awm meuh lo chu a ni ber. Olympic erawh inbuatsaih nana sum hman a tam a, khawvel ram hrang hrang 205 zet nghawng a nih bawk avangin a lo thlawna a thamral mai a rinawm loh thung.

Tokyo Olympic hi nikuma neih tur kha a ni a, mahse hri leng vangin kum khatin an sawn hla. International Olympic Committee (IOC) chuan nikum bak kha chu sawn nawn theih a nih lo thu an tichiang, a thlengtu Japan pawhin fimkhur taka kalpui ngei an tum ruh hle.

July 23 aṭangin Tokyo Olympic 2020 hi neih a ni dawn. A hmun pangngaiah August 24 aṭang hian pianphunga rualbanlote tana buatsaih hran bik 'Paralympic' chu neih chhunzawm leh a ni bawk ang.

An fimkhur dawn
Ram 205 aṭangin infiammi 11,091 zet pungkhawm tura beisei an ni a, inelna chi hrang hrang 339 zet a awm ang. Khawvel hmun hrang hrang, chhak leh thlang - chhim leh hmar aṭangin mihring an fuan khawm dawn tihna a ni.

Olympic leh Paralympic hmachhawn tur zawng zawng chu coronavirus lakah an fihlim a ngai dawn, hri lakah an fihlim em, tih chu ni tin an endik ṭhin dawn. Chaw ei lai, tui in lai, training leh inelna hmachhawn lai ni loah chuan hmai tuamna (mask) an vuah reng tur a ni bawk.

Infiammi zingah hri leng laka endikna hmachhawn duh lo chu Japan ramah zin luh phal a ni dawn lo. Tun dinhmunah Japan hian May 11 thleng awh turin Tokyo bakah hmun dang pathumah inkhuahkhirhna an kalpui mek a ni.

Inelna thlengtu tur lam chuan thuchhuah siamin, "Inkaihhruaina hrang hrang kan siam a, hei hian infiammi bakah official leh Tokyo mipuite chu hri leng lakah a venhim theih ngei kan beisei," an ti a, beiseina sang tak nen Olympic an thlir.

June nghah a ngai
Hri leng karah infiamna lian leh lian lo zawkte pawh kaltlangpui hram hram a ni mek, hmun ṭhenkhatah chuan a hmuna entu an awm laiin entu awm loa khelh chu a tam zawk an la ni rih - Tokyo Olympic pawh hi entu an awm thei dawn em, tih a la chiang lo.

Japan hian hri leng vanga buaina an hmachhawn ve tho a, ram hruaitu leh mipui lam pawh an fimkhur hle. Stadium chhungah a khatin mipui an lut lo ang tih chu a rin theih, engzatin nge a hmunah en thei ang, tih chu zawhna awm mek a ni.

Olympic official chuan thuchhuah siamin, "Boruak inlumlet vel kan ngaichang reng, keini lam chuan a hmunah entu a tam thei ang ber hi awm se tih hi kan duhthusam a ni. Mahse khawvel dinhmun kan ngaihtuah tel a ngai dawn.

"Entute dinhmun tur hi ngun takin kan ngaihtuah a, keini chuan June thla hi nghah phawt a ṭha kan ti. Chumi hunah chuan entu awm theih dan tur a chiang chauh ang," an ti. A hmunah entu an tam thei lo a nih pawhin ram tel an tam avangin TV lamah entu a tam zual ang.

Inbuatsaihna ṭha
Damdawi lam thiam leh hri leng chungchang thlir lawktute chuan, a thawh lina (fourth wave) chu Japan ramah hian thleng thei niin an sawi. Ram mipui tam takin Olympic thlen loh mai an duh hial, mahse sorkar thuneitu leh International Olympic Committee (IOC) erawhin beisei an la nei reng.

IOC president Thomas Bach chuan, "Organising Committee leh Coordination Commission hnen aṭangin chanchin thar kan hre zel, kan hriat ve tawh chinah chuan Olympic thleng tawh zingah Tokyo khawpui aia inbuatsaihna nei ṭha hi an la awm ngai lo.

"Mi zawng zawng him taka an awm theihna tur chu kan ngaih pawimawh a ni. Infiammi leh anmahni ṭawiawm tute chauh an ni lo, a bik takin Japan mipuite himna chu kan dah pawimawh. Khawvelin beiseina nen Tokyo a thlir mek hi a lo thlawna thamraltir kan tum lo," a ti.

Kar hmasa mai khan Tokyo 2020 chief Seiko Hashimoto chuan, "Ṭhulh tumna a awm lo," tiin a lo sawi tawh bawk a, thil thleng leh a nghawng na tak awm thei zawng zawng chhut chungin an kaltlangpui ngei a rinawm.

Beiseina chu
Olympic an neih tawh ṭhinah chuan, a bul ṭanna Greece aṭangin meichher an chhi ṭan a, khawvel ram hrang hrangah meichher hi tlan kual puiin, chumi hnuah inelna neihna tur hmunah an chhi kai chhawng leh ṭhin.

Tokyo Olympic atan pawh hian a tirah chuan Greece aṭangin meichher an chhi ṭan, mahse ram dangah kal kualpui theih a ni ta lo. Kumin tir lam khan Japan ramah hian mei hi an det leh a, hmun 47 a paltang tur zinga 14 chu a paltlang tawh - Fukushima, Nagano leh Osaka te pawh a tel.

Meichher hi mi 2,500 zetin an keng tawh a, mi 7,910-in an la keng leh ang. July 23-a hawnna hun hman a nih hunah mei det a ni ang a, inelna neih chhung zawngin mei hi a mit tawh lo ang - Olympic huangah meichher hian hmun pawimawh a chang.

Tokyo 2020 chief Seiko Hashimoto chuan, "Olympic meichher hian hun thim tak kara khawvar lo awm tur chu a entir. Hun bi neia pangpar mawi tak par ang a ni a, buaina leh harsatna ten chim buai mah se par chhuah a ṭhulh chuang lo," tiin a lo sawi tawh.

Inkaihhruaina
• Japan rama zin lut tur zawng zawngte chu, an zin hmain Covid-19 lakah an fimhlim em, tih endikna vawi hnih an hmachhawn hmasa tur a ni.
• Inelna hmachhawn tura infiammi zin lut tawhte pawh ni tin endik chhunzawm tur a ni ang.
• Inelna hmachhawn tur midang zawng zawng pawh a tir lam ni thum chhung chu ni tin endik vek an ni dawn.
• Olympic atan hian motor ruahmansa bik hman theih a ni dawn lo.
• Motor chhungah infiammi an chuang dun a nih pawhin inbiak phal a ni
lo ang.
• Infiammite hi an thlenna hmunah ei leh in tihna tur hmun a awm dawn, hmun dangah thil ei phal a ni dawn lo.
• Coronavirus endikna hmachhawn duh lote chu Japan ramah zin luh an phal dawn lo.